काठमाडौं । हिन्दू मुसलमानबीचको साम्प्रदायिक सद्भाव बिथोलिन सुरु भएको सरकार मौन बनेकोमा चिन्ता व्यक्त गरिएको छ । रौतहटको तनाव वीरगञ्वमा सरेको घटना पछि जिल्ला प्रशासन कार्यालय पर्साले वीरगन्जमा कर्फ्यू आदेश जारी गरेको हो ।
महानगरपालिकामा सोमबार साँझ ५ बजेदेखि लागू हुने गरी कर्फ्यू आदेश जारी गरियो । हिन्दु युवा परिषद्का युवाहरूले सोमबार वीरगन्ज बजार बन्द गराएपछि मुस्लिम र हिन्दु युवाहरूबीचको विवाद बढेर जाँदा जिल्ला प्रशासन कार्यालयले कर्फ्यू आदेश जारी गरेको हो ।
वीरगन्जको परवानीपुर चोकदेखि भन्सार चोक र महानगरको सीमा जोडिएको बारा जिल्लाको सीमासम्म कर्फ्यू आदेश जारी गरिएको पर्साका प्रमुख जिल्ला अधिकारी दिनेशसागर भुसालले जानकारी सार्वजनिक गरे ।
केही दिनअगाडि रौतहटको ईशनाथ नगरपालिकाको घिउडा गाउँमा सरस्वतीको मूर्ति सेलाउने क्रममा हिन्दु र मुस्लिम समुदायबीच विवाद भएको थियो । त्यसपछि वीरगन्जमा पनि हिन्दुवादीहरूले प्रदर्शन गर्दै बजार बन्द गराएका हुन् ।
बजार बन्द गराउने क्रममा हिन्दु परिषद्का युवाहरूको जुलुसमा मुस्लिम समुदायका व्यक्तिबीच भनाभन हुँदा प्रहरीले हस्तक्षेप गरेर स्थिति नियन्त्रणमा लिएको थियो ।
वीरगन्जको मुख्य चोकहरूमा हिन्दुवादी र मुस्लिमहरू भेला भएपछि नेपाल प्रहरी र सशस्त्र प्रहरी ठूलो संख्यामा परिचालन गरिएको पर्साका निमित्त प्रहरी प्रमुख कुमारविक्रम थापाले जानकारी दिए ।
हिन्दुवादीहरूले जुलुस निकाल्दा मुस्लिम समुदायका युवाहरूले हिन्दु धर्मको झण्डा च्यात्न थालेपछि स्थिति तनावपूर्ण बनेको उनले बताए ।
घटनाको परिदृश्य पछि शृंखलालाई हेरेर केही पर्यवेक्षकहरूले हिन्दू मुसलमानबीचको सामाजिक सम्प्रदाय बिथोलिने क्रमलाई सरकारले नबुझेकोमा चिन्ता व्यक्त गरेका छन् ।
हिन्दूवादीहरूले जुलुस निकाल्दा जिल्ला प्रशासनसँग अनुमति लिएको अवस्थामा यस्तो भिडन्तको अवस्था सिर्जना हुनु झन् खतरनाक कुरो हुने उनीहरू बताउँछन् ।
