काठमाडौँ । हाल बेलायत भ्रमणमा रहेका एनआरएनएका नेता बद्री केसीले विरोधको सामना गर्नुपरेको छ । उनी भ्रष्टाचारमा लिप्त भएको र संघमा समेत विभाजन ल्याएको भन्दै अभियन्ताहरुले विरोध गरेका हुन् ।
यस्तै लन्डनस्थित नेपाली दूतावासकी कार्यवहाक राजदूत रोशन खनालविरुद्ध पनि नाराबाजी भएको बताइएको छ । अल्डरसटमा एउटा समूहले गरेको एक कार्यक्रममा एनआरएनए यूके अध्यक्ष प्रेम गाहा मगर समर्थक एक दर्जन युवाहरुले केसी र खनालविरुद्दसमेत नाराबाजी गरेका हुन् ।
बेलायतका लागि समावेशी राजदूत चाहियो, बद्री केसी आइएलओमा भ्रस्टाचार गरेको पैसा फिर्ता गर, पूर्वाग्रही उपनियोग प्रमुख रोशन खनाल राजिनामा देऊ आदि लेखिएका प्लेकार्ड बोकेर नाराबाजी भएको थियो ।
युवाहरुको होहल्लाका कारण केसी र खनालहरुको कार्यक्रम केही बेर बिथोलिनै पुगेको थियो । बद्री केसी रसियन जासुस भएको, उनले आइएलओमा करोडौँ भ्रस्टाचार गरेको अनि उपनियोग प्रमुख रोशन खनालले एनआरएनए यूके अध्यक्ष प्रेम गाहामगरलाई गत १५ अगष्टका दिन गुल्मी जिल्ला समाज यूकेको निमन्त्रणमा बेलायत आएका गुल्मी रेसुंगा नगरपालिका प्रमुख खिलध्वज पन्थी, कालीगण्डकी गाउँपालिका प्रमुख वेदबहादुर थापा तथा गुल्मी दरबार गाउँपालिका प्रमुख सरोजकुमार थापा र उपप्रमुख तारा थापा ढेंगासंगै दूतावास जान खोज्दा दूतावासमा प्रवेश नदिइएको भन्दै युवाहरु आक्रोशित भएको एनआरएनएका एक अभियन्ताले बताए ।
नेपाल सरकार प्रधानमन्त्री तथा मन्त्रिपरिसदको कार्यालयले भदौ ११ गते खनालको पूर्वाग्रही कदमविरुद्द गम्भीर रुपमा लिंदै आवश्यक कारबाहीका लागि परराष्ट्र मन्त्रालयलाई निर्देशन दिंदा समेत खनाल प्रमुख अतिथी भएर कार्यक्रममा पुगेपछि युवाहरु थप आक्रोशित भएर विरोधमा ओर्लिएको उनले बताए ।
विशेषगरी प्रदर्शनकारीहरुले अन्तर्राष्ट्रिय श्रम संगठन आइएलओको पैसा भ्रस्टाचार गर्ने केसीलाई कारबाहीको माग गरेका थिए ।
