काठमाडौं । राजस्व अनुसन्धान विभागले अभौतिक मुद्रा क्रिप्टो करेन्सी(USDT COIN) को कारोवार गर्नेहरु माथि अनुसन्धान सम्पन्न गरी आज ललितपुर जिल्ला अदालतमा अभियोग दायर गरेको छ ।क्रिप्टो करेन्सी(USDT COIN) को कारोवारको अनुसन्धान गरेका राजस्व अनुसन्धान विभागका अनुसन्धान अधिकृत नवराज अधिकारीले अनुसन्धान सम्पन्न गरी आज ललितपुर, जिल्ला अदालतमा अभियोग दायर गरेका हुन् ।
अनुसन्धान अधिकारीले करिव ५ महिनाको सुक्ष्म अनुसन्धान पश्चात् प्रतिवादीहरु स्थायी ठेगाना झापा भएका शुभम कुमार यादव र रोहन चौधरी उपर अभियोग दायर भएको बताएका छन्। प्रतिवादि शुभम कुमार यादवले बाइनान्स एप(Binance App) को प्रयोग गरी पिटुपी(p2p)च्यानलको (channel) को प्रयोग गरी अभौतिक मुद्राको कारोवार गरेको अनुसन्धान बाट खुलेको छ । साथै शुभम कुमार यादवले कारोवारको रकम राख्नन तथा झिक्ने प्रयोजनका लागि उनकै साथी रोहन चौधरीको खाता प्रयोग गर्ने गरेको अनुसन्धान बाट खुलेको छ । निज प्रतिवादिहरुलाई विदेशी विनिमय नियमित गर्ने ऐन, २०१९ को दफा १७ बमोजिमको सजाय मागदावि गरि अभियोग दायर गरेको अनुसन्धान अधिकारी एवम् सुचना अधिकारी नवराज अधिकारीले बताएका छन् ।
राजस्व अनुसन्धान विभागका महानिर्देशक नवराज ढुंगानाले अभौतिक मुद्राको कारोवारलाई राजस्व अनुसन्धान विभागले सुक्ष्म रुपमा अनुसन्धान गर्दै गरेको जानकारि दिएका छन् । पछिल्ला दिनहरुमा राजश्व चुवावट नियन्त्रणमा कृयाशिल राजस्व अनुसन्धान विभागले अभौतिक मुद्राको कारोवारको अनुसन्धान समेत गरिरहेको छ ।
