काठमाडौं । प्रहरीले बागलुङको इमेज बचत तथा ऋण सहकारी संस्थाको कोषाध्यक्ष लक्ष्मी सेन सुनार पक्राउ गरेको छ । उनलाई ललितपुरबाट पक्राउ गरिएको  नेपाल प्रहरी प्रधान कार्यालयको केन्द्रीय अनुसन्धान ब्युरोका प्रवक्ता तथा सूचना अधिकारी नवराज अधिकारीले जानकारी सार्वजनिक गरेका हुन् ।
प्रवक्ता तथा सूचना अधिकारी नवराजले जनाए अनुसार बचतकर्ताको रकम हिनामिना गरेको आरोपमा सरिता तिमल्सेना (कँडेल)सहितको संयुक्तरुपमा सहकारीका सञ्चालक समितिका अध्यक्ष देवकुमार नेपालीसमेत ८ जना विरुद्ध जाहेरी परेको थियो।
बचतकर्ताको डेढ अर्ब र विभिन्न बैंकहरुको ३५ करोड गरी करिब २ अर्ब रुपैयाँ हिनामिना गरी बेपत्ता रहेका बागलुङको ढोरपाटनका मेयरसमेत रहेका इमेज बचत तथा ऋण सहकारी संस्थाका अध्यक्ष देवकुमार नेपालीलाई पक्राउ गर्न प्रहरीले ’रेड कर्नर नोटिस’ निकालेको छ ।

सोही जाहेरीका आधारमा पक्राउ गर्न प्रहरीले जिल्ला अदालत बागलुङबाट पक्राउ अनुमति लिएको थियो। खोजतलासका क्रममा आठजना मध्येकी सहकारीको कोषाध्यक्ष २७ वर्षीया सुनार प्रहरीको फन्दामा परेकी हुन् । थप अनुसन्धानका लागि जिल्ला प्रहरी बागलुङ पठाएको प्रहरीले जनाएको छ। प्रहरीले सहकारीमा आवद्ध अन्य व्यक्तिहरूको खोजि गरिरहेको थियो। 
सहकारीको रकम हिनामिनामा नेपाली र उनकी श्रीमतीसहित ८ जनाविरुद्ध मुद्दा चलिरहेको छ । तर अध्यक्ष नेपाली भने गत बैशाखदेखि नै फरार छन् । उनै नेपाली र उनकी श्रीमती छेला नेपालीलाई पक्राउ गर्न प्रहरी प्रधान कार्यालयले संसारभरका प्रहरीहरुको अन्तरराष्ट्रिय प्रहरी सञ्जाल (इन्टरपोल)मार्फत् ’रेड कर्नर नोटिस’ जारी  गर्न लगाएको  हो ।
अध्यक्ष नेपाली विदेशमा लुकेर बसेको आशंका भएको भन्दै सहकारीका पीडितहरुले रेड कर्नर नोटिस जारी गर्नुपर्ने माग गरे बमोजिम रेडकर्नर नोटिस जारी भएको हो ।
बागलुङका डिएसपी मदन केसीले नेपाली दम्पत्तीलाई पक्राउ गर्न इन्टरपोलले रेड कर्नर नोटिस जारी गरेको जनाएका छन् । 
उनीहरुविरुद्ध १ हजार ५ सय ५० जना सर्वसाधारणले प्रहरीमा जाहेरी दिएका थिए । उक्त जाहेरीको आधारमा सरकारी वकिलको कार्यालयले जिल्ला अदालतमा संगठित ठगीको मुद्दा दायर गरेको छ ।  उनीहरुविरुद्ध अदालतले जेठमै पक्राउ पुर्जी जारी गरेको थियो । तर उनीहरु भने बैशाख ६ गतेदेखि नै तरलता अभावले बन्द भएको भन्दै सूचना टाँसेर फरार भइसकेका थिए ।

सहकारीका बचतकर्ताको १ अर्ब ६० करोड रुपैयाँ नेपालीले हिनामिना गर्नु बाहेक नेपालीले ग्लोबल आइएमई बैक, राष्ट्रिय सहकारी बैंक र गरिमा बिकास बैंकको गरी झण्डै ३५ करोड ऋण समेत लिएको देखिएको छ ।

मुद्दाकै आधारमा सहकारीका अन्य पदाधिकारी चित्रबहादुर भण्डारी, नरमती बुढा, शक्ति किसान, डोरबहादुर परियार र अनिता बुढामगर पक्राउ परिसकेका छन् ।
उनीहरुलाई जिल्ला अदालत बागलुङको गत साउन ५ गतेको आदेशले पुर्पक्षकालागि थुनामा पठाइएको थियो । पक्राउ परेका ५ जनाले अदालतमा सहकारीमा आफूहरुको कुनै हात नभएको बयान दिएका छन् ।