काठमाडौं । हवाई उडान क्षेत्रको नियामक निकाय नेपाल नागरिक उड्डयन प्राधिकरणले धरानमा विमानस्थल बनाउन उपयुक्त नहुने देखिएको जनाएको छ ।नागरिक उड्डयन प्राधिकरणले मंगलबार एक सूचना जारी गरी यस्तो जनाएको हो ।
प्राधिकरणले तराई तथा भित्री मधेशमा विमानस्थल निर्माण गर्दा निकटस्थ विमानस्थलबाट कम्तीमा ४० नटिकल माइल हुनुपर्ने नीतिगत व्यवस्था विपरीत हुने हुँदा धरानमा विमानस्थल उपयुक्त नहुने निष्कर्ष निकालिएको जनाएको छ ।साथै आर्थिक विश्लेषणबाट सडक यातायातको सहज उपलब्धता र त्यस क्षेत्रको भौगोलिक अवस्थितिका कारण समेत त्यहाँ विमानस्थल सम्भव नरहेको प्राधिकरणले जनाएको छ ।
यसैगरी धरानमा हवाई यातायातको दीर्घकालीन, नियमित र व्यावसायिक सम्भावना पनि नरहेको प्राधिकरणले जनाउँदै विभिन्न प्राविधिक र सञ्चालनमा आउने कठिनाइले धरानमा विमानस्थल आवश्यक नरहेको निष्कर्षमा पुगिएको जनायो । यसअघि यसका लागि चर्चा बटुलेर धरान उपमहानगरपालिकाको मेयर पदमा निर्वाचित भएका हर्क साम्पाङले धरानमा विमानस्थल बनाउनुपर्ने माग गरी त्यसका लागि सकेसम्मको दबाब दिँदै आएका छन् ।
मेयर साम्पाङको दबाबलाई सम्बोधन गर्न सरकारले एक समिति बनाएर धरानमा विमानस्थल बनाउन आवश्यक रहे–नरहेको बारे अध्ययन गरेको थियो । सोही अध्ययन आधारमा धरानमा विमानस्थल आवश्यक नरहेको निष्कर्षमा प्राधिकरणले खुलाएको हो ।
