काठमाडौं । आज साताको पहिलो दिन आइतबार सेयर बजार दोहोरो अंकको गिरावटलाई निरन्तरता दिएको छ । आइतबार ११. ७८ अंकले ओर्लेर १९६०. ३० बिन्दुमा अडेको छ । यो केही बेर १९६० भन्दा पनि तल झरेर गएको थियो ।
आज २ अर्ब ८ करोड २७ लाख ८६ हजार ८९ रुपैया ८ पैसा बराबरको कारोबार भयो । विभिन्न कम्पनीहरूका गरी ५५ लाख ७४ हजार २ सय ७ कित्ता सेयरको कारोबार भएको छ । कुल कारोबार संख्या ४५ हजार ४ सय ४२ भएको नेप्से दर्शाएको छ । यसअघि गत साताको अन्तिम दिन बिहीबार नेप्से दोहोरो अंक २८.६८ अंकले घटेर १९७२. ०९मा झरेको थियो ।
अढाई अर्ब रुपैयाँ भन्दा बढीको सेयर खरिद बिक्री कारोबारका लागि विभिन्न कम्पनीहरूका गरी ७४ लाख ४६ हजार ९सय ९१ कित्ता सेयरको किनबेच भएको थियो । सेयर बजारको निरन्तर गिरावटका कारण निराशाको लहर फैलिन गएको पर्येक्षकहरूको भनाइ छ ।
