काठमाडौं । अर्थमन्त्री वर्षमान पुनसँग नेपालका लागि रुसी राजदूत एलेक्सेई नोभिकोभले समसामयिक विषयमा दुई पक्षीय हितका विषयमा छलफल गरेका छन् । सिंहदरबारस्थित अर्थ मन्त्रालयमा बुधबार भएको मन्त्री पुन र राजदूत नोभिकोभबीचको भेटवार्तामा रुसी सेनामा नेपालीको सहभागिता, नेपालमा रुसले लगानी गर्न चाहेका विषयमा छलफल भयो ।
अर्थमन्त्री पुनको सचिवालयले सार्वजनिक गरेको जानकारी अनुसार भेटवार्तामा आगामी वैशाखमा हुन लागेको लगानी सम्मेलनका विषयमा पनि छलफल भएको थियो । अर्थमन्त्री पुनले ठूला जलविद्युत् आयोजना र रासायनिक मल कारखानामा लगानी गर्न रुसलाई आग्रह गरेका थिए । मन्त्री पुनले भेटका क्रममा रुसी राजदूतलाई नेपालले विद्युत्का लागि अन्तर्राष्ट्रिय बजारको सुनिश्चितता गरिसकेको छ ,जलविद्युत् क्षेत्र अन्तर्राष्ट्रिय लगानीकर्ताका लागि उपयुक्त क्षेत्र हो, भनेका थिए,। साथै उनले सरकारले स्वदेशमै रासायनिक मल कारखाना खोल्ने नीति लिएको र रुस मलको कच्चा पदार्थ उत्पादन गर्ने विश्वकै ठूलो देश भएकोले मल कारखाना खोल्न इच्छुक भए वातावरण बनाउन तयार भएको बताए ।
