काठमाडौं । राष्ट्रपति रामचन्द्र पौडेलले चार्टर्ड अकाउन्टन्ट(सीए)हरू देशका आर्थिक पहरेदार भएको बताएका छन् ।नेपाल चार्टर्ड अकाउन्टन्ट संघको कार्यक्रममा बिहीबार राष्ट्रपति पौडेलले यस्तो बताएका हुन् ।
लेखा व्यवसायीहरुको सक्रियताको कारण मुलुकमा हुने आर्थिक क्रियाकलापहरुमा पारदर्शिता कायम गर्न सकिएको बताउँदै राष्ट्रपति पौडेलले कुनै देशको खर्च र हिसाब प्रणालीको पारदर्शिता नै आर्थिक पहिचान भएको धारणा सार्वजनिक गरे ।
विकास निर्माणको ठूला खर्चमा प्रयोग हुनसक्ने फर्जी बिल र राजस्व छलीको नियन्त्रण लेखा परीक्षणबाटै सम्भव हुने बताउँदै राष्ट्रपति पौडेलले कुनैपनि क्षेत्रमा हुनसक्ने सानादेखि ठूला आर्थिक चुहावट तथा हिनामिना हुनबाट रोक्न यसले मद्दत गर्ने विश्वास व्यक्त गरे ।
उनले हरबखत चनाखो रहेर हिसाव मिलान गर्नु र गराउनु नै लेखा परीक्षणको धर्म रहेको र आफ्नो कर्ममा धर्म नबिर्सिनु नै न्याय भएकाले न्यायोचित ढंगबाट कर्म सम्पादन गरिरहका लेखा परीक्षकहरु राष्ट्रका आर्थिक पहरेदार भएको बताए ।
