काभ्रेपलाञ्चोक ।श्रम, रोजगार तथा सामाजिक सुरक्षामन्त्री डोलप्रसाद (डीपी) अर्यालले प्रधानमन्त्री रोजगार कार्यक्रम बजारको माग र आवश्यकका आधारमा जनशक्ति उत्पादनमा केन्द्रित रहेको बताउनुभएको छ । काभ्रेपलाञ्चोकको पनौती नगरपालिकामा आज आयोजित स्थानीय रोजगार केन्द्र तथा दिगो कार्यका लागि परामर्शदाता विषयक छलफल कार्यक्रमलाई सम्बोधन गर्दै उहाँले उक्त कार्यक्रमलाई निरन्तरता दिई आउँदो आर्थिक वर्षमा थप उत्साहपूर्वकरुपमा कार्यक्रम सञ्चालन हुने जानकारी दिनुभयो ।
“प्रधानमन्त्री रोजगार कार्यक्रमको मोडालिटी परिवर्तन हुनसक्छ, हामी भइरहेका कामबाट सिक्दै थप प्रभावकारी बनाउन मोडालिटी परिमार्जन लागेका छौँ”, मन्त्री अर्यालले भन्नुभयो । उहाँले प्रम रोजगार कार्यक्रम केन्द्रीय, प्रदेश र स्थानीय तीनै तहका सरकारको साझा कार्यक्रम भएको बताउनुभयो । उहाँले भन्नुभयो, “यो साझा कार्यक्रमअन्तर्गत न्यूनतम रोजगारीमा सहभागी हुन जाहने नागरिकलाई उनीहरुको इच्छा अनुसारको काममा छनोट गर्न दिई लगाउनुपर्छ ।”
मन्त्री अर्यालले देशमा उपलब्ध स्रोत साधनको पूर्णरुपमा उपयोग गरी भएका स्रोतलाई त्यसै खेर फालेर नयाँको खोजीमा मात्रै लाग्दा उपलब्धि प्राप्तिमा कठिनाइ हुने बताउनुभयो । स्थानीय तहका सरकारलाई उहाँले आग्रह गर्नुभयो, “सीप–रोजगारसँग जोडिएका कार्यक्रमको बारे प्रचारप्रसार गरेर अधिकतम सहभागितामा ध्यान दिनुहोस् ।” कार्यक्रमअन्तर्गत कतिमा स्वरोजगार सिर्जना भयो भन्नेबारे तथ्याङ्क राख्नसमेत उहाँले रोजगार सेवा केन्द्रलाई आग्रह गर्नुभएको छ ।
कार्यक्रममा नगर प्रमुख रामशरण भण्डारीले स्थानीयस्तरमा रोजगारी सिर्जना गर्ने कार्यक्रम सोचेअनुसार हुन नसकेको दुःखेसो पोख्दै प्रधानमन्त्री रोजगार कार्यक्रमलाई स्वरोजगारमुखी बनाउन सके निरन्तरता पाउने बताउनुभयो । उहाँले वर्षमा कम्तीमा सय दिन रोजगारी दिनुपर्ने भए पनि ५३ दिनभन्दा बढी रोजगारी बताउनुभयो ।
सो अवसरमा नगर उपप्रमुख गीता बञ्जारा, बनेपा नगर उपप्रमुख विमला सापकोटा, पनौती उद्योग वाणिज्य सङ्घका अध्यक्ष भोला थापालगायतले प्रधानमन्त्री रोजगार कार्यक्रमलाई परिमार्जित गरी फरक ढङ्गबाट सञ्चालन गर स्वरोजगारमूलक बनाउनुपर्नेमा जोड दिनुभएको थियो ।
