काठमाडौं । सहमति जुटाउनका लागि मन्त्रीपरिषद् बैठक र प्रतिनिधि सभाको बैठकको समय सारिएको छ । मंगलबार बिहान ११ बजेका लागि निर्धारित मन्त्रीपरिषद् बैठक दिउँसो २ बजेका लागि सारिएको छ ।
यसैगरी आज आगामी आर्थिक वर्षका लागि बजेट प्रस्तुत गर्नका लागि बोलाइएको प्रतिनिधि सभाको बैठकको समय पनि सारिएको छ । दिउँसो १ बजेका लागि बोलाइएको प्रतिनिधि सभाको बैठक दिउँसो ३ बजेका लागि सारिएको छ ।
खानेपानी मन्त्री राजेन्द्र कुमार राईले जानकारी सार्वजनिक गरेअनुसार मन्त्रीपरिषद् बैठक र संसद् बैठकको समय परिवर्तन भएको छ । संसदीय छानबिन समिति गठनका लागि सहमति जुटाउनका लागि बैठकको समय सारिएको बुझिएको छ ।
प्रमुख प्रतिपक्षी दल नेपाली कांग्रेसले उपप्रधानमन्त्री तथा गृहमन्त्री रवि लामिछाने संलग्न रहेको सहकारी ठगी प्रकरणमा संसदीय छानबिन समिति बनाउनुपर्ने माग गदै संसद अवरोध गर्दै आएको छ । छानबिन समिति गठन नभए संसद चल्न नदिने कांग्रेसले चेतावनी दिएको छ ।
