काठमाडौं । काठमाडौं महानगरपालिकाका मेयर बालेन साहले ल्याएको ‘नो भेइकल जोन’ बनाउने प्रस्ताव न्युरोडमा अल्पमतमा परेको छ ।मेयर बालेनले ल्याएको नो भेइकल जोन बनाउने प्रस्ताव अनुसार न्युरोडलाई बनाउन गरिएको प्रस्ताव विरुद्ध नगरसभामा लगिएको संशोधन प्रस्तावमा बहुमत देखिएको हो ।
मेयर बालेनले आगामी आर्थिक वर्ष २०८१/८२ का लागि प्रस्तुत गरेको नीति तथा कार्यक्रमको ३८ नम्बर बुँदामा ‘सूचीकृत सम्पदा क्षेत्र लगायत नयाँ सडक (न्युरोड), हाँडीगाउँ जस्ता प्राचीन, पुरातात्विक र विशेष महत्वका क्षेत्रहरूलाई नो भेइकल जोनका रूपमा विकास गरिने छ’ राखेका छन् ।
न्युरोडलाई नो भेइकल जोन बनाउने प्रस्तावमा प्रमुख तीन राजनीतिक दल नेपाली कांग्रेस, नेकपा एमाले र एकीकृत समाजवादीबाट निर्वाचित जनप्रतिनिधिहरूले आपत्ति जनाएर विरोध गरेका छन् ।
