काठमाडौं ।सिंहदरबार बाहिर सत्ता समीकरण फेरिन लागेको हल्लाबीच चौबीस घन्टा भित्रै प्रधानमन्त्री पुष्पकमल दाहाल प्रचण्ड र सत्ता गठबन्धनको सबै भन्दा ठुलो दल नेकपा एमालेका अध्यक्ष केपी शर्मा ओलीबीच दोस्रो पटक भेटवार्ता भएको छ ।
प्रधानमन्त्री पुष्पकमल प्रचण्ड र नेकपा एमालेका अध्यक्ष ओलीबीच आज सोमबार बिहान भेटवार्ता भएको हो । प्रधानमन्त्रीको सचिवालयले प्रधानमन्त्री निवास बालुवाटारमा भएको भेटमा समसामयिक राजनीतिक परिस्थिति, सरकारका कामकारबाही, शान्ति प्रक्रियाका बाँकी काम टुंगो लगाउने लगायतका विषयमा छलफल भएको जनाएको छ ।
आइतबार पनि प्रचण्ड, ओली र रास्वपा सभापति रवि लामिछानेबीच सिंहदरबारमा छलफल भएको थियो । आइतबारको सो भेटको चौबीस घन्टा भित्रै प्रधानमन्त्री प्रचण्ड र एमाले अध्यक्ष ओलीको यो बालुवाटार बैठक हुन पुगेको हो ।
आइतबार रास्वपाका सभापति एवं उपप्रधानमन्त्री तथा गृहमन्त्री रवि लामिछानेले जनताका नाममा राष्ट्रिय सहमतिको सरकार प्रस्ताव अगाडि सारेको भोलिपल्टको यो भेटलाई अर्थपूर्ण मानिएको छ ।
प्रधानमन्त्री प्रचण्डको आइतबार भएको ओलीसँगको भेटअघि नेपाली कांग्रेसका सभापति शेरशहादुर देउवाले ओलीसँग भेट गरेका थिए । त्यसपछि सत्ता समीकरणमा फेरबदल हुने चर्चा फैलिन गएको थियो ।
