काठमाडौं। गत वर्षको तुलनामा यो जुलाईमा विदेशी पर्यटकको आगमन बढेको भएपनि गएको जुनको महिनाको तुलनामा घटेको छ। जुलाई महिनामा कुल ६४ हजार ५सय ९९ पर्यटक हवाई मार्ग भइ। नेपाल आएका हुन् ।
नेपाल पर्यटन बोर्डले जनाए अनुसार यो संख्या पोहर जुलाईको तुलनामा ११.९१ प्रतिशतले बढी हो ।यो गत जुनको भन्दा कम हो । गत जुनमा हवाई मार्गबाट आउने विदेशी पर्यटकहरूको संख्या ७६ हजार ७ सय ३६ थियो ।
जुलाईमा सबैभन्दा धेरै २१ हजार ४ सय ९१ पर्यटक भारतबाट आए । यस्तै अमेरिकाबाट ७ हजार ८६४, चीनबाट ६ हजार ८१९, बेलायतबाट ३ हजार ८०६, बंगलादेशबाट ३ हजार ४७०, अस्ट्रेलियाबाट १ हजार ९०१, दक्षिण कोरियाबाट १ हजार ५३७, मलेसियाबाट १ हजार १२५ र जापानबाट १ हजार ११४ पर्यटक आएको तथ्यांक छ।
यो वर्ष मार्च महिनामा १ लाख २८ हजार विदेशी पर्यटकले नेपाल भ्रमण गरेका थिए। अप्रिलमा त्यो संख्या १ लाख ११ हजारमा झरेकामा मेमा ९० हजार पर्यटक विभिन्न गन्तव्यमा पुगेका थिए।
