काठमाडौँ । अमेरिकाको भर्जिनिया राज्यमा एक नेपाली नर्स बेपत्ता हुँदा सो प्रकरणमा उनका पति पक्राउ परेका छन् ।प्रहरीले उनका श्रीमान् नरेश भट्टलाई हत्कडी लगाएर लगिरहेको दृश्य त्यहाँको स्थानीय सञ्चारमाध्यमहरूले प्रसारण गरेको दृश्यमा देखिएको हो ।
बिहीबार अपराह्न घरबाट प्रहरीले बेपत्ता पारिएकी नर्सका श्रीमानलाई हत्कडी लगाइ प्रहरीले गाडीमा हालेर लगेको दृश्य देखिएको थियो ।भर्जिनियाको स्थानीय अनलाइन पोर्टल इन्साइड नोभा डटकमले लेखेअनुसार प्रहरीले २८ वर्षीया नर्स ममता काफ्लेको हत्या भएको आशंका गरेको र शव लुकाएको आशंकामा उनका श्रीमान् नरेशलाई पक्राउ गरेको छ ।
जानकारहरुका अनुसार, महेन्द्रनगर कञ्चनपुर स्थायी घर भएका भट्टले सन् २०२० मा मात्र विवाह गरेका थिए । दुईबीच पछिल्लो समय सुमधुर सम्बन्ध थिएन । काफ्लेले सम्बन्ध विच्छेद गर्न विभिन्न व्यक्तिहरुसँग परामर्श गरेको समेत खुलेको छ ।
तर, अन्तिम पटक जुलाई ३१ (१६ साउन) मा मनसास पार्कमा देखिएकी ममता काफ्ले त्यसयता सम्पर्कविहीन हुँदा श्रीमान् नरेशले खोजीका लागि निवेदन पनि नदिएको जनाइएको छ ।आफन्त र साथीभाइले चासो देखाएपछि केही दिनपछि प्रहरी आफैं उनको घरमा पुगेको थियो । त्यसपछि बल्ल उनले श्रीमती हराएको भन्दै प्रहरीलाई खोजी गरिदिन अनुरोध गरेका थिए ।
मनसास पार्क पुलिस विभागले जारी गरेको सूचना अनुसार, उनीसँग साथीहरुले अन्तिम पटक २८ जुलाई (१३ साउन) मा कुरा गरेका थिए भने पतिले ३१ जुलाई (१६ साउन) मा अन्तिम पटक देखेको बताएका छन् । पछिल्लो पटक प्रहरीले गरेको प्रेस ब्रिफिङमा मनसास पार्क पुलिसका प्रमुखले श्रीमान् नरेशले अनुसन्धानमा सहयोग नगरेको भन्दै उनी यो मामलामा शंकास्पद व्यक्ति भएको बताएको थियो । त्यस लगत्तै प्रहरीले उनको घरमा छापा समेत हानेको थियो ।
इन्साइड नोभाले एक जना अटर्नीलाई उदृत गर्दै प्रहरीले थप प्रमाण फेला पारेपछि नरेशलाई पक्राउ गरेको भनेको छ । काफ्लेको अवस्था भने अहिलेसम्म पत्ता लागेको छैन ।उनका पूर्वसहकर्मी सुनिता बस्नेत थापाका अनुसार, उनको खोजीका लागि मनसास पार्कमा साथीभाइहरु स्वेच्छिक रुपमा भेला भएर प्रदर्शन समेत गरेका थिए । ‘उनी हराएको विषयमा सबैलाई थाहा होस् र मिडियासम्म पनि यो कुरा पुगोस् भनेर भेला भएका हौं’, उनले भनेकी छन् ।
पति नरेशले पहिले स्थानीय सञ्चारमाध्यमहरुसँग श्रीमतीसँग आफ्नो कुनै झगडा पनि नभएको भन्दै जहाँ भएपनि आउन अनुरोध गरेका थिए । यद्यपि, उनी ममताको खोजी गर्न माग गर्दै भएको प्रदर्शनमा सहभागी भएका थिएनन् । मोबाइलबाटै सम्बोधन गरेका थिए र आफूले एक वर्षको बच्चाको ख्याल गर्नुपर्ने भएकाले आउन नसकेको बताएका थिए ।
