काठमाडौँ । प्रहरीले एक विदेशी नागरिकलाई करिब ४ करोड मूल्य बराबरको लागु औषध कोकिनसहित पक्राउ गरेको छ । प्रहरीले आईभोरी कोष्टका नागरिक भमरा कोनलाई पक्राउ गरेको हो ।
कोनको साथबाट १ किलो ८८ ग्राम कोकिन फेला परेको लागु औषध नियन्त्रण ब्युरोका सूचना अधिकारी प्रेम बहादुर शाहीले आइतबार जानकारी दिए । गत भदौ ३ गते कतार एयरलाइन्सको उडानद्वारा नेपाल आएका कोनलाई कोकिनका ६९ वटा क्याप्सुलसहित ठमेल ज्याठास्थित एक होटेलबाट पक्राउ गरिएको शाहीले जनाएका छन् ।
अभियुक्त कोनले क्याप्सुलहरू निलेर नाइजेरियाबाट हिँडी ईथोपियाबाट दोहा हुँदै काठमाडौँ आएको प्रारम्भिक अनुसन्धानको क्रममा खुलेको प्रहरीले जनाएको छ । निज उपर लागु औषध नियन्त्रण ऐन, २०३३ बमोजिम आवश्यक कारबाही प्रक्रिया अघि बढाइएको ब्युरोले जनाएको छ ।
