हेटौडा । हेटौडा काठमाडौँ जोड्ने सबै बाटो सञ्चालनमा आएका छन् ।मकवानपुर र ललितपुर जोड्ने बगुवाको बागमती पुलमा अस्थायी सडक बनाएर कान्तिलोकपथ सञ्चालनमा ल्याइएको हो । हेटौडा र काठमाडौँलाई जोड्ने आधा दर्जन मार्ग सन्चालनमा आएका छन् ।
१२ असोजको बाढीले बागमती पुलको आधा भाग बगाएको थियो । ललितपुरतर्फको सडक यसअघि नै पुनः सञ्चालनमा आएपनि बागमती खोलामा पुल बगाएकाले कान्तिलोकपथ यातायात सेवा बन्द थियो ।द्रुत मार्ग निर्माणमा संलग्न रहेका नेपाली सेनाको सहयोग लिएर मकवानपुरको भीमफेदी गाउँपालिका र ललितपुरको बागमती गाउँपालिकाले बगुवामा ४ वटा ह्युमपाइप हालेर अस्थायी सडक निर्माण गरिएको छ ।
भीमफेदी गाउँपालिका अध्यक्ष हिदम लामाले मंगलबार बिहानबाट हलुका सवारी चल्न थालेको जानकारी सार्वजनिक गरे । बागमती गाउँपालिकाका स्थानीयहरूका अनुसार त्यहाँनेर सडक साँघुरो र एकतर्फी भएकाले हलुका सवारी मात्रै सञ्चालनमा छ ।बागमती पुल बगाउँदा विगत १० दिनदेखि मकवानपुर–ललितपुरको यातायात सेवा बन्द भएको थियो । हेटौडा र काठमाडौँलाई जोड्ने कान्तिलोकपथ महत्वपूर्ण बाटो हो ।
हेटौडा–कुलेखानी–सिस्नेरी–दक्षिणकाली–काठमाडौँ, कुलेखानी–फाखेल–हुमानेभन्ज्याङ–फर्पिङ–काठमाडौँ र कुलेखानी–महालक्ष्मीखोला–चखेल–मातातीर्थ–काठमाडौँ गरी तीन वटा वैकल्पिक मार्ग आइतबार साँझबाटै सञ्चालनमा आएका थिए ।कुलेखानी–मार्खु–चित्लाङ–चन्द्रागिरी–थानकोट सडक भने बुधबारदेखि नै खुलाइएको थियो । हेटौडालाई धादिङ नौबिसे हुँदै काठमाडौँ जोड्ने पुरानो सडक त्रिभुवन राजपथ भने पहिल्यैदेखि सञ्चालनमा छ ।
