काठमाडौँ । नेपाली सेनाको कमान्डमा सुरक्षा निकायलाई त्रिभुवन अन्तर्राष्ट्रिय विमानस्थलमा अनग्राउन्ड रहेको भारतीय हवाई जहाजमा बम खोज्न परिचालन गरिएको छ ।भारतको राजधानी नयाँदिल्लीबाट काठमाडौँस्थित त्रिभुवन अन्तर्राष्ट्रिय विमानस्थलमा अवतरण गरेको भारतीय निजी वायुसेवा कम्पनी भिस्टारा एयरवेजको जहाजमा बम राखेको हल्ला फैलिए पछि खोज तलाश शुरु गरिएको हो ।
भिस्टारा एयरवेजको उडान नम्बर ‘यूके १५५’ भएको उक्त जहाज अहिले ‘अनग्राउन्ड’ रहेको छ । जहाजमा बम राखेको फोन दिल्लीबाटै आएको विमानस्थल स्रोतले जनाएको छ ।स्रोतका अनुसार बम राखेको खबर पाइएपछि कमान्डमा सुरक्षा निकायले जहाजको खानतलासी सुरु गरेको छ । पछिल्लो समय भारतीय जहाजहरूमा बम राखेको हल्ला फैलिने क्रम बढेको छ ।
बमको हल्ला आएको र अहिले टोली विमानस्थलमा पुगेको काठमाडौंका प्रमुख जिल्ला अधिकारी जयनारायण आचार्यले जानकारी सार्वजनिक गरे ।काठमाडौं विमानस्थलमा अहिले उडान–अवतरण रोकिएको छ । नेपाली सेना सहितको सुरक्षा निकायले जहाजमा खानतलासी गरिरहेको छ ।
