काठमाडौं ।नेपाल उद्योग वाणिज्य महासंघका अध्यक्ष चन्द्रप्रसाद ढकालले निजी क्षेत्रलाई सम्मानपूर्वक काम गर्ने अवसर दिनुपर्नेमा जोड दिएका छन्।
उनले नेपाली कांग्रेसले आयोजना गरेको शुक्रबारको कार्यक्रममा यो धारणा राखेका हुन्।
सुधारको पहिलो सन्देश भनेको सबै राजनीतिक दलहरूले उद्यमी र व्यवसायीलाई प्रोत्साहन र समर्थन दिनु भएको ढकालले बताए।
सम्पत्ति निर्माण नगरी कुनै व्यक्ति, समाज वा देश धनी बन्न नसक्ने भन्दै ढकालले कुनै ठाउँमा यदि बदमासी भए त्यसलाई नियन्त्रण गर्न सकिने तर समग्र निजी क्षेत्रको मानमर्दन गर्नुको साटो सम्मान गर्नुपर्ने बताए। व्यवसाय दर्ता, नवीकरण र राजस्व बुझाउने प्रक्रियामा एकीकृत प्रणाली ल्याउनुपर्नेमा उनले जोड दिए।
अध्यक्ष ढकालले साना उद्यमीलाई परियोजना धितोमा कर्जा दिनुपर्ने आवश्यकता औंल्याएको बताए। यसको लागि महासंघले जोखिम न्यूनीकरणको योजना बनाइसकेको र प्रतिवेदन सरकारलाई बुझाइसकेको बताए।
विकासोन्मुख देशमा स्तरोन्नति र जोखिमको आकलन
नेपाल दुई वर्षपछि विकासोन्मुख देशमा स्तरोन्नति हुने भए पनि योजना आयोगको रणनीतिले त्यसमा रहेका जोखिमलाई न्यूनीकरण गर्न नसकेको टिप्पणी ढकालले गरे।उनले निजी क्षेत्र रणनीति बनाउन तयार रहेको स्मरण गराउँदै २०२१ मै यस सम्बन्धी पहिलो प्रतिवेदन सार्वजनिक गरिएको बताएका छन्।
विगत दुई वर्षदेखि बजार नियन्त्रणका लागि अपनाइएका नीतिहरूले अर्थतन्त्रमा समस्या ल्याएको भन्दै उनले कम मागका कारण बजारमा चहलपहल घटेको र उद्यमीहरू लगानी गर्न हतोत्साहित भएको बताए। महासंघले दसैं–तिहार लक्षित सर्वेक्षणबाट गत वर्षको तुलनामा बिक्री ४० प्रतिशतसम्म घटेको देखिएको तथ्यांक पनि उनले प्रस्तुत गरेका छन्।
ढकालका अनुसार अर्थतन्त्र निराशाजनक अवस्थामा छैन तर सुधारका सम्भावना प्रशस्त रहेको बताए। नेपालको पहिलो क्रेडिट रेटिङले बीबी माइनस देखाएको उल्लेख गर्दै उनले अर्थतन्त्र अहिले स्थिर भए पनि सानो झट्काले जोखिम बढ्न सक्ने चेतावनी दिएका छन्।
