सिरहा।सिरहा जिल्लाको लहान वडा नं. २ निवासी राम चन्द्र यादवले कृषि विकास बैंक लहान शाखाको ज्यादतीका कारण आफ्नो परिवार गम्भीर संकटमा परेको गुनासो गरेका छन् । बैंकले कानूनी र नैतिक प्रक्रिया विपरीत यादवको करोडौं मूल्य बराबरको सम्पत्ति कौडीको भाउमा लिलाम गरेको आरोप लागेको छ । यादवले मिति २०७७ फागुन १५ गते कृषि विकास बैंक लहान शाखाबाट रु. ३०,००,००० (तीस लाख रुपैयाँ) कर्जा लिएका थिए । उक्त कर्जाका लागि धरौटीका रूपमा उनले सिरहाको साविक सिंगराही मटियर्वा गाउँ विकास समितिको कि.नं. ४६९ अन्तर्गत रहेको ७.२५ धुर जग्गा र त्यहाँ बनेको १२ कोठे दुईतल्ले पक्की घर बैंकमा रोक्का राखेका थिए । यादवले कर्जा लिएको तीन वर्षभित्र रु. १९,९२,७७३ भुक्तानी गरे तापनि बैंकले २०८० असोज २९ मा उक्त सम्पत्तिलाई लिलामीको सूचना जारी गरेको थियो । पीडित यादवका अनुसार, जग्गा र घरको वास्तविक मूल्यांकन रु. १ करोड ९५ लाख भएको थियो । तर बैंकले उक्त सम्पत्तिलाई मात्र रु. ३५ लाखमा सुनसरीको भोकराहा गाउँपालिकाकी तारा कुमारी रौनियारको नाममा रजिष्ट्रेसन पास गरिदिएको छ ।

यादवले भने, "म यसअघिदेखि नै नियमित रूपमा व्याज तिर्दै आएको छु । तर बैंकले मलाई पटक–पटक फोनमार्फत धम्की दिँदै मेरो सम्पत्ति लिलाम गरिदिने चेतावनी दिएको थियो । बैंकले वास्तविक मूल्यांकन बिना नै यस्तो निर्णय गर्‍यो, जुन अन्यायपूर्ण छ ।" राम चन्द्र यादवले आफ्नो सम्पत्ति फिर्ता गर्न आग्रह गर्दै बैंकको कदमलाई गम्भीर लापरबाहीको संज्ञा दिएका छन् । "म आफैं रु. ३५ लाख बुझाएर जग्गा फिर्ता लिन तयार छु । यस घटनाले लहान क्षेत्रमा व्यापक आक्रोश सिर्जना गरेको छ । स्थानीयवासीहरूले बैंकको निर्णयलाई अनैतिक र कानूनी प्रक्रियाविपरीत ठहर गरेका छन् । "यति ठूलो सम्पत्ति कौडीको भाउमा लिलाम गर्नु ठाडो अन्याय हो । यस्तो कदमले सर्वसाधारणलाई बैंकप्रति अविश्वास पैदा गर्छ," स्थानीय एक व्यक्तिले बताए । यादवले सरकार, मानव अधिकारवादी संस्थाहरू, र न्यायालयसँग यस घटनाको निष्पक्ष छानबिन गरी आफ्नो सम्पत्ति फिर्ता गराउन सहयोगको अपिल गरेका छन् । यो घटनाले बैंकिङ प्रणालीको पारदर्शिता र निष्पक्षतामाथि गम्भीर प्रश्न उठाएको छ । पीडित यादव र उनका परिवारले न्यायको आशा गरिरहेका छन्, भने स्थानीयवासीहरू बैंकको यस्तो कदमलाई रोक्न ठोस कदम चाल्न माग गरिरहेका छन् ।