काठमाडौँ । राजस्व अनुसन्धान विभागले नियन्त्रणमा लिएको एक कन्टेनर ब्रान्डेड जुत्ताको मालिकको खोजी र अनुसन्धान तीव्र पारेको छ । गत मंसिर ४ गते नुवाकोटबाट ना ३ ख ७०१ नम्बरको ब्रान्डेड जुत्ता लोड गरिएको कन्टेनर  विभागले नियन्त्रणमा लिएको थियो ।

रसुवा भन्सार कार्यालयबाट छुटेको उक्त कन्टेनरमा  प्रज्ञापन पत्रमा उल्लेख भएको सुटकेश , सिरक तथा बल्यान्केटको सट्टा ब्रान्डेड जुत्ता भेटिएको थियो । प्रज्ञापन पत्रमा उल्लेख भएभन्दा फरक मालवस्तु भेटिएपछि तीव्र अनुसन्धानमा लागेको राजस्व अनुसन्धान विभाग जुत्ताको वास्तविक मालिक पत्ता लगाउने र भन्सार राजस्व छल्ने तरिकाको जरा पत्ता लगाउने कार्यमा जुटेको छ ।

बम्जन इन्टरप्राइजेजले ल्याएको उक्त कन्टनेरमा प्रज्ञापन पत्रमा उल्लेख भए विपरीत एक करोड ७५ लाख भन्दा बढीका ब्रान्डेड जुत्ता फेला परेपछि बम्जन इन्टरप्राइजेजका  बुद्ध लामालाई पक्राउ गरेर अनुसन्धान गरिँदै छ । दुई हजार जोर भन्दा बढी ब्रान्डेड जुत्ता गलत तरिकाबाट  ल्याएकोले अनुसन्धान विभागले बुद्ध लामा र कुमार श्रेष्ठलाई अहिले पनि थुनामा राखेर अनुसन्धान गरिरहेको राजस्व अनुसन्धान विभाग स्रोतले जनाएको छ । बुद्ध लामा विगत लामो समयदेखि क्यारिङको काम गर्दै आएका छन् ।

यता भन्सार विभागले रसुवागढी भन्सार कार्यालयका तीन कर्मचारीलाई विभागमा तानेको छ । स्रोतका अनुसार ती कर्मचारीहरूलाई राजस्व अनुसन्धान विभागले छानबिन समेत गरेको छ । भन्सार विभागले शिवम् श्रेष्ठ, हंस रावल र लोकबहादुर विष्टलाई भन्सार विभागमा तानेको छ । 

राजस्व अनुसन्धान विभागले अनुसन्धान गरिरहेको ब्रान्डेड जुत्ताको अनुसन्धान  टुंग्याएर माघको पहिलो सातासम्म मुद्दा लाने तयारी गरिरहेको बताइएको छ । रसुवा भन्सार कार्यालयले सामान चेकजाँच गरेरै मालवस्तु छुटाएको तर सामान ल्याउनेले भन्सार यार्ड भित्रै कन्टेनर भित्र मालवस्तु अदलबदल गरेको बताइएको छ । यद्यपि भन्सार एजेन्ट , कर्मचारी र व्यापारीको मिलोमतोमा भन्सार राजस्व  चुहावटको अवस्था भयावह छ ।

राजस्व अनुसन्धान विभागले अनुसन्धान गरी झण्डै पाँच करोड भन्दा बढी बिगो र जरिवाना माग दाबी सहितको मुद्दा लान सक्ने स्रोतले बताएको छ ।

दुई दिनदेखि रसुवागढी भन्सार नाका ठप्प

बिना भन्सार एक कन्टेनर ब्रान्डेड जुक्ता रसुवा भन्सार नाकाबाट आएपछि अनुसन्धान तीव्र पारेको राजस्व अनुसन्धान विभाग र भन्सार विभागले  रसुवागढी भन्सार कार्यालयमा कडाइ ग¥यो ।  एक कन्टेनर ब्रान्डेड जुत्ता भन्सार आएपछि भन्सारका तीन कर्मचारीलाई विभाग तानियो । संयोगवंश प्रमुख भन्सार अधिकृत  तुलसीप्रसाद भट्टराई विदामा थिए । उक्त घटना पछि रसुवा भन्सार कार्यालयले  चाइनाबाट आएका मालवस्तुको भन्सार जाँचपास गर्ने क्रममा एक एक चेक गर्न थाल्यो । मालवस्तुको घोषणा पनि व्यापारीले घोषणा गरेको भन्दा बढी मूल्यांकन गरेर छुटाउन थाल्यो । त्यसपछि क्रमिकरूपमा विरोधमा उत्रिएका  व्यापारीहरूले दुई दिनदेखि रसुवागढी भन्सार नाका ठप्प पारेका छन् । रसुवाबाट आउने मालवस्तु अहिले छुटाइएके छैन् । दुई दिनमा सयौँको संख्यामा रसुवागढी भन्सार यार्डमा कन्टेनरहरू लामबद्ध थुप्रिएका छन् ।