काठमाडौँ । नेपाल विद्युत् प्राधिकरणले काठमाडौं–तराई÷मधेस द्रुतमार्ग (फास्ट ट्र्याक) अन्तर्गत मकवानपुर भीमफेदी गाउँपालिका–८ मान्डु माल्टाबेँसी र इन्द्रसरोवर गाउँपालिका–३ सिस्नेरी कोगटे क्षेत्रमा पर्ने सडक निर्माणका लागि आवश्यक विद्युत् वैकल्पिक व्यवस्थाबाट आपूर्ति गर्ने जनाएको छ ।

विद्युत् अभावमा फास्ट ट्र्याक  निर्माण प्रभावित हुन नदिन प्राधिकरणले वैकल्पिक व्यवस्था गरी जतिसक्दो छिटो विद्युत् आपूर्ति गर्न  काम अगाडि बढाइसकेको जनाएको हो । उक्त क्षेत्रका बासिन्दाको विद्युत् आपूर्तिमा  कुनै समस्या नपर्ने गरी यो वैकल्पिक व्यवस्था गर्न लागिएको छ ।प्राधिकरणका अनुसार फास्ट ट्र्याकको  मान्डु माल्टाबेँसी र सिस्नेरी कोगटे क्षेत्रमा पुल, ग्यालरी सुरुङ, सुरुङ लगायत संरचना निर्माणका लागि आवश्यक विद्युत् अभावमा निर्माण प्रभावित हुन नदिन वैकल्पिक व्यवस्था गरी आपूर्ति दिन लागिएको छ ।

फास्ट ट्र्याकलाई  उक्त क्षेत्रमा करिब १२ मेगावाट विद्युत् आवश्यक पर्ने छ । त्यस क्षेत्रमा चार प्याकेजमा निर्माण कार्य भइरहेको छ ।विद्युत् आपूर्ति वैकल्पिक व्यवस्था अन्तर्गत कुलेखानी पहिलो जलविद्युत् केन्द्र ढोर्सिङबाट मान्डुसम्मको पहिले चालु ६६ केभी लाइन ११ केभीमा सञ्चालनमा ल्याइने जनाइएको छ ।काठमाडौंमा जगेडा रहेको २२.५ एमभीएको पावर ट्रान्सफर्मर ढोर्सिङ सबस्टेशन लगेर सोहीमार्फत फास्ट ट्र्याकका लागि आवश्यक विद्युत् आपूर्ति गरिने छ ।

ढोर्सिङ सबस्टेशनमा स्थानीय रूपमा विद्युत् आपूर्तिका लागि हाल ५ एमभीए क्षमताको पावर ट्रान्सफर्मर पूर्णभारमा चालु रहेकाले थप विद्युत् प्रवाह गर्न नसकिने भएकाले  अर्को ठूलो क्षमताको ट्रान्सफर्मर थपिने छ ।११ र १२ असोजको अविरल वर्षाका कारण आएको बाढी–पहिरोले मान्डु हाइड्रोपावर लिमिटेडले सञ्चालन गरेको २२ मेगावाट बागमतीखोला साना जलविद्युतको विद्युतगृह लगायत संरचनामा ठूलो क्षति पु¥याइ विद्युत् उत्पादन बन्द भएयता फास्ट ट्र्याकअन्तर्गत उक्त खण्डमा विद्युत् आपूर्तिमा समस्या भएको हो ।

आयोजनाबाट उत्पादित विद्युत् प्रवाह गर्ने स्विचयार्ड र त्यहाँ प्राधिकरणले राखेको पावर ट्रान्सफर्मर लगायत उपकरण समेत बागमती नदीमा आएको बाढीले बगाइदिएको थियो ।आयोजनाबाट उत्पादित विद्युत् ६६ केभी प्रसारण लाइन मार्फत ढोर्सिङ र ३३ केभी लाइनमार्फत ललितपुर माल्टा सबस्टेशनतर्फ प्रवाह गरिएको थियो ।

माल्टा सबस्टेसनबाट ११ केभी लाइनमार्फत फास्ट ट्र्याकलाई आपूर्ति दिइएको थियो । माल्टा सबस्टेसनमा ललितपुरमै सञ्चालनमा रहेको अर्को २ मेगावाटको खानीखोला जलविद्युत् आयोजना पनि जोडिएको भएपनि  बाढीपहिरोले खानीखोलामा पनि क्षति पुगेपछि माल्टा सबस्टेसन विद्युत् स्रोतविहीन बनेको थियो । अनि त्यसपछि फास्ट ट्र्याकको विद्युत् आपूर्ति बन्द भएको थियो । अहिले दुवै आयोजना पुनर्निर्माण चलिरहेको छ । 

विद्युत् आपूर्ति नहुँदा फास्ट ट्र्याक निर्माणमा काम गर्न कठिनाई उत्पन्न भएको नेपाली सेनाले जानकारी गराएपछि प्राधिकरणका कार्यकारी निर्देशक कुलमान घिसिङ, वितरण तथा ग्राहक सेवा निर्देशनालयका उपकार्यकारी निर्देशक मनोज सिलवाल लगायत सम्मिलित उच्चस्तरीय टोलीले सोमबार मान्डु माल्टाबेँसी क्षेत्रको स्थलगत निरीक्षण गरेको थियो ।

टोलीले पुनर्निर्माण भइरहेको बागमतीखोला साना जलविद्युत् आयोजना र ढोर्सिङ सबस्टेसनको भ्रमण गरी तत्काल विद्युत् आपूर्ति गर्न सकिने विभिन्न विकल्पमा सम्बन्धित पदाधिकारीसँग छलफल पनि गरेको थियो ।आयोजना पुनर्निर्माण आगामी चैतभित्र सक्ने गरी काम भइरहेको छ । उक्त आयोजना सञ्चालन आएपछि पुरानै व्यवस्था अनुसार विद्युत् आपूर्ति दिइने जनाइएको छ ।

कार्यकारी निर्देशक घिसिङले आयोजना सञ्चालनमा नआएसम्म ढोर्सिङ सबस्टेसनमा पावर ट्रान्सफर्मर थप्ने र ढोर्सिङ–मान्डु लाइनलाई ११ केभीमा चार्ज गरी फास्ट ट्र्याकलाई विद्युत् आपूर्तिको व्यवस्था गर्नु तत्कालका लागि उपयुक्त विकल्प भएको बताए ।
घिसिङले जनाए अनुसार  राष्ट्रिय गौरवको आयोजनाको काम प्रभावित हुनु हुँदैन । अहिले यहाँ आपूर्ति दिन विद्युत् स्रोतको अभाव हो ।बाढीले क्षति पु¥याएका जलविद्युत आयोजनाबाट विद्युत् उत्पादन सुरु नभएसम्म वैकल्पिक व्यवस्था मार्फत आपूर्ति दिनुपर्छ । यसका लागि तत्काल काम सुरु गर्नुपर्छ ।

उपकार्यकारी निर्देशक सिलवालले जनाए अनुसार लाइन पुनस्र्थापना गर्न स्थानीय रूपमा गर्नुपर्ने आवश्यक काम तत्काल अगाडि बढाउन पालुङ र हेटौंडा वितरण केन्द्र प्रमुखलाई निर्देशन दिइएको छ ।  यसबारे सबै सरोकारवालालाई तदारुकता देखाउन आग्रह पनि गरिएको छ ।