Apr 04 2025 | २०८१, चैत २२गते
काठमाडौं। पोखरा आज देशकै सबैभन्दा प्रदूषित सहर बनेको छ। वातावरण विभागका अनुसार पोखराको गण्डकी बोर्डिङ क्षेत्रको वायु गुणस्तर सूचकांक (एक्यूआई) १८७ पुगेको छ।
५० एक्यूआईभन्दा माथि प्रदूषण सूचकांक भएको वायुलाई अस्वस्थ मानिन्छ। यसैगरी, चितवनको भरतपुर दोस्रो स्थानमा छ भने यसको एक्यूआई १७० रहेको छ। नेपाल सरकारको वन तथा वातावरण मन्त्रालय अन्तर्गतको वातावरण विभागले गरेको वायु गुणस्तर निगरानी अनुसार, भैंसेपाटी १५४ एक्यूआईसहित तेस्रो स्थानमा छ भने रत्नपार्क क्षेत्रको वायु गुणस्तर १५१ एक्यूआई रहेको छ। वातावरण विभागका अनुसार, खुमल्टार, शंखपार्क, भक्तपुर र धुलिखेल क्षेत्र पनि आज सर्वाधिक प्रदूषित सहरहरूमा पर्छन्।
हिजो २०८ एक्यूआईसहित शंखपार्क देशकै सबैभन्दा प्रदूषित स्थान बनेको थियो। वातावरण विभागका अनुसार, ०-५० एक्यूआईसम्मको सूचकांकलाई मात्र राम्रो मानिन्छ। ५१-१०० एक्यूआईलाई मध्यम, १०१-१५० लाई अस्वस्थ, १५१-२०० लाई धेरै अस्वस्थ, २०१-३०० लाई निकै अस्वस्थ र ३०१ भन्दा बढी एक्यूआईलाई खतरनाक तहमा पुगेको मानिन्छ।
मंसिरदेखि जेठसम्म वायु प्रदूषण उच्च हुने भएकाले सुरक्षा अपनाउन वातावरण विभागले सूचना जारी गरेको छ। विभागले भनेको छ, “वायु प्रदूषणले मानव स्वास्थ्यमा नकारात्मक असर पार्छ, विशेष गरी बालबालिका, वृद्धजन, श्वासप्रश्वास र मुटुका बिरामी तथा गर्भवती महिलाहरूलाई यसले बढी प्रभाव पार्छ। यस्तो बेला विशेष सावधानी अपनाउन अनुरोध गरिन्छ।”
विश्वभरको वायु प्रदूषण निगरानी गर्ने आईक्यू एअरका अनुसार, काठमाडौं विश्वकै सातौं सबैभन्दा प्रदूषित सहर बनेको छ। विश्वभरको तुलनामा १६१ एक्यूआईसहित काठमाडौं सातौं स्थानमा छ।
आईक्यू एअरका अनुसार, भियतनामको हानोई २१३ एक्यूआईसहित प्रदूषित सहरको पहिलो स्थानमा छ। छिमेकी राष्ट्र चीनको वुहान १६३ एक्यूआईसहित छैठौं स्थानमा छ भने भारतको दिल्ली १६० एक्यूआईसहित आठौं स्थानमा रहेको छ।
© 2025 All right reserved to Nayasadak.com | Site By : Sobij
