काठमाडौँ । राजस्व अनुसन्धान विभागले दुई बेग्लाबेग्लै अदालतमा बिगोको शतप्रतिशत गरी १६ करोड बढीको माग दाबी लिई मुद्दा दायर गरेको छ ।राजस्व अनुसन्धान विभागले उच्च अदालत जनकपुर वीरगञ्ज इजलासमा १ करोड ९३ लाख बढी र उच्च अदालत विराटनगर अस्थायी इजलास इलाममा बिगोको शतप्रतिशत गरी १४ करोड ५८ लाख बढीको मुद्दा दायर गरेको हो ।

राजस्व अनुसन्धान विभागले ६० किलो चाँदी स्कूटरमा फल्स बटम बनाइ अवैधरूपमा चोरी पैठारी गरेको प्रकरणको अनुसन्धान सकी उच्च अदालत जनकपुर वीरगञ्ज इजलासमा मुद्दा दायर गरेको छ ।९६ लाख ६० हजार ८ सय ६४ रुपैया बिगो कायम गरी बिगोको शतप्रतिशत सजाय जरिवाना मागदाबी लिएर राजस्व अनुसन्धान विभागले उक्त मुद्दा फागुन ६ गते दायर गरेको जनाएको हो ।

राजस्व अनुसन्धान विभागले जारी गरेको विज्ञप्ति अनुसार राजस्व चुहावट गरेको कसुरमा बारा जिल्ला कलैया उपमहानगरपालिका वडा न ५ बस्ने रामसोगारत साहका छोरा वर्ष ३६का कर्मा साह सोनार विरुद्ध उक्त मुद्दा दायर गरेको हो ।

सोही मुद्दामा पर्सा जिल्ला वीरगञ्ज महानगरपालिका वडा न.२८ बस्ने महादेव साह सोनारका नाति असर्फी साहका  छोरा वर्ष ४०का शंकर साह सोनार भन्ने शंकरप्रसाद सोनार , कलैया उपमहानगरपालिका वडान ६ बस्ने भक्त बहादुर परियारकी छोरी कर्मा साह सोनारकी श्रीमती वर्ष ३७ की इन्द्रकुमार परियारसमेत उपर मुख्य अभियुक्तको सजायको आधा सजाय माग दाबी लिइएको छ ।

यसैगरी स्थायी लेखा नम्बर ६००७२०२८५ भएको कृष्ण स्टोरका प्रोपराइटर झापा जिल्ला भद्रपुर नगरपालिका वडान ५ बस्ने पन्नलाल कानुका नाति सुवाशचन्द्र कानुका छोरा वर्ष ३७का सोनु कानु विरुद्ध राजस्व चुहावट कसुरमा विभागले फागनु ७ गते मुद्दा दायर गरेको जनाएको छ ।

उक्त मुद्दामा ७ करोड २९लाख २३ हजार ३३० रुपैया ४७ पैसा बिगो कायम गरी सोको शतप्रतिशत सजाय मागदाबी लिएर विभागले इलाम इजलासमा मुद्दा दायर गरेको जनाएको छ । कानुले भारतीय कपडा चोरी पैठारी गरी मूल्य अभिवृद्धि कर र आयकर राजस्व चुहावट गरको कसुरमा अनुसन्धान गरी मुद्दा दायर गरिएको विभागको विज्ञप्तिमा उल्लेख छ ।