काठमाडौँ । दुवै सदनबाट एटीए कार्नेटसम्बन्धी विधेयक पारित हुने भएबाट उद्योगी व्यवसायी खुशी भएका छन् । लामो समयदेखि माग गर्दै आएको विषय सम्बोधन हुने भएपछि खुशी व्यक्त गरेका हुन् ।अन्तर्राष्ट्रिय व्यापार मेलामा लैजाने सामानको व्यवस्थापनका निमित्त व्यवसायीहरुले वर्षौंदेखि माग गरिआएको  ‘एटीए कार्नेट’ सम्बन्धी व्यवस्था भएको विधेयक  प्रतिनिधि सभामा दर्ता गराइएको छ ।  निकासी पैठारी (नियमन) विधेयक, २०८१ मा यस्तो समस्याको सम्बोधन गरिएको हो । भन्सार क्षेत्रमा कररहित ढुवानी सुविधा भनिने एटीए कार्नेट (एडमिसन टेम्पोरायर) उल्लेख नगरी यसका सुविधाहरु सम्बोधन गर्ने प्रयास प्रस्तावित विधेयकमा गरिएको छ ।

उद्योग मन्त्रालयले प्रतिनिधि सभामा दर्ता गरेको यो विधेयक पारित हुन प्रक्रियागत समय लाग्ने देखिएको छ । 
विधेयकमा ‘मेला वा प्रदर्शनीको लागि निकासी वा पैठारी गर्न सकिने’ व्यवस्था गरिएबाट  स्वदेश वा विदेशमा आयोजना हुने औद्योगिक वा व्यापारिक मेला वा प्रदर्शनीको लागि कुनै वस्तु निकासी वा पैठारी गर्नुपरेमा उद्योग विभागले प्रचलित कानुनबमोजिम सम्बन्धित निकायको सिफारिस गर्नेछ । यसले  त्यस्तो वस्तु निकासी वा पैठारी गर्न अनुमति दिन सक्ने भएपछि  नेपालबाट अन्तर्राष्ट्रिय व्यापार मेलामा सहभागी हुने र नेपालमा हुने मेलामा सहभागी हुने बाह्य व्यवसायी दुवैलाई फाइदा पुग्ने छ । 

विधेयकमा भनिएको छ ‘औद्योगिक वा व्यापारिक मेला वा प्रदर्शनीको लागि कुनै वस्तु निकासी वा पैठारी गरेकोमा त्यस्तो वस्तु बिक्री नभई बाँकी रहन गएमा विभागले त्यसरी बाँकी रहेको वस्तुको निकासी वा पैठारी गर्न अनुमति दिन सक्नेछ,’

यससम्बन्धी कुनै कानुन नहुँदा विदेशमा हुने मेलामा सहभागी नेपाली व्यवसायीहरुले बिक्री नभएको सामान कम मूल्यमा उतै छाड्नुपर्ने र  नेपालमा आयोजना हुँदा  अन्तर्राष्ट्रिय व्यापार मेलामा विदेशी  ठूला व्यवसायीहरु आउन नै नमान्ने अवस्था सिर्जना भएको छ । 
हाल यो काम  सरकारी अधिकारीहरुको विवेक र तजबिजका आधारमा  सामानहरु फिर्ता पठाइने गरिएको थियो । अन्तर्राष्ट्रिय मेलामा सहभागी हुने नेपाली व्यवसायीहरुले भने बहुमूल्य सामग्री पनि कम नाफामै बिक्री गरी फर्कने गरेका थिए । निकासी पैठारी व्यवसायमा संलग्न व्यवसायीहरूले यसबाट निकासीमा फाइदा पुग्ने विश्वास गरेका छन् । 
 एटीए कार्नेट के हो ?

निकासी पैठारीको सहजीकरणका गरिने यस्तो  व्यवस्थालाई अन्तर्राष्ट्रिय स्तरमा एटीए कार्नेट भनिन्छ । एटीए कार्नेट एक अन्तर्राष्ट्रिय भन्सार कागजात हो । यसले कुनै पनि वस्तुलाई भन्सार कर वा अन्य कर तिरी अस्थायी रूपमा अर्को देशमा लैजान अनुमति दिन्छ । अर्थात् अस्थायी आयात र निर्यातको लागि यो सुविधा उपलब्ध हुन्छ । एकै कागजातले धेरै देश यात्रा गर्न सकिने सुविधासहित सामान्यतया वस्तुहरू एक वर्षसम्म राख्न सकिने सुविधा प्राप्त हुन्छ ।  यो व्यापार मेला, प्रदर्शनी, एक्स्पो, व्यावसायिक उपकरण, वा सांस्कृतिक तथा खेलकुद सामग्री लैजान उपयुक्त मानिन्छ ।

कुनै वस्तु बेच्न नभई अन्तर्राष्ट्रिय रूपमा प्रदर्शनी, व्यापार मेला वा अस्थायी प्रयोगका लागि अर्को देशमा लैजानुपर्दा सामान्य निर्यातआयात प्रक्रियामा भन्सार शुल्क लाग्न सक्छ । तर, एटीए कार्नेट प्रयोग गर्दा यी शुल्कमा छुट पाइन्छ । संसारका ८० भन्दा बढी देशमा यो मान्य भए पनि नेपालमा भने हालसम्म लागु भएको छैन । सम्बन्धित देशका चेम्बर अफ कमर्स वा भन्सार निकायबाट जारी हुने यो सुविधा लिन धरौटी भने राख्नुपर्ने हुन्छ ।