काठमाडौँ । त्रिभुवन विमानस्थल भन्सार कार्यालयले भन्सार चेकजाँच गरी छाडेका मालवस्तु राजस्व अनुसन्धान विभागले  पक्राउ गरेपछि विमानस्थल भन्सार कार्यालयमा बबण्डर मच्चिएको छ । पीआरसी इन्टरप्राइजेजका सञ्चालक पर्शुराम चौधरीले ल्याएका कपडा तथा मालवस्तुहरू त्रिवि भन्सार कार्यालयले चेकजाँच गरी छाडेको थियो । उक्त मालवस्तु राजस्व अनुसन्धान कार्यालयले नियन्त्रणमा लिएर अनुसन्धान गरिरहेको छ ।

पीआरसी इन्टरप्राइजेजले ल्याएका कपडा, चश्माका फ्रेमहरू अहिले पनि राजस्व अनुसन्धान विभागको प्राङ्गणमा अनुसन्धानको क्रममा छन् । यसअघि पनि पटक पटक एयरपोर्ट भन्सार कार्यालयबाट छुटेका मालवस्तु राजस्व अनुसन्धान विभागले नियन्त्रणमा लिएर थप अनुसन्धान र  कारबाही गर्दै आएको थियो । राजस्व अनुसन्धान विभागले एयरपोर्ट भन्सार कार्यालयबाटै आएका ड्रोनहरूको आयात र कारोबारहरूमा ठूलो मात्रामा राजस्व छली भएको आशंकामा एक फर्ममा छापा हानेको छ । छापा हानेर राजस्व अनुसन्धान विभागले उक्त फर्मको कारोबारसम्बन्धी कागजात ,मोबाइल र कम्प्युटर नियन्त्रणमा लिएको छ ।

ड्रोन आयात र कारोबारमा संलग्न दिपेश चालिसेलगायत अन्य ड्रोनका कारोबारी र फर्महरूमा राजस्व अनुसन्धान विभागले अनुसन्धान अघि बढाएको छ । त्रिभुवन अन्तर्राष्ट्रिय विमानस्थल भन्सार कार्यालयबाट भन्सार जाँचपास भएर छुटेका सामानहरू राजस्वले नियन्त्रण गर्न लागेपछि  विमानस्थल भन्सार कार्यालयका कर्मचारीहरू बीचमै बबण्डर भएको छ ।

भन्सार कार्यालयका उपसचिव शान्तिराम निरौँलाको निर्देशन र सेटिङमा मालवस्तुहरूको न्यून मूल्यांकन गरी  छुटेको र राजस्वले पटक पटक समाउने गरेको विषयमा भन्सार कार्यालय भित्र कर्मचारीहरू बीच नै  बबण्डर हुँदा हिजो केही समय भन्सार कार्यालयको कामै ठप्प भएको स्रोतले बताएको छ । त्रिवि भन्सार कार्यालयमा  कर्मचारीहरूको स्वार्थ बाझिँदा वैदेशिक रोजगारमा गएका सैयौँ नेपालीहरूले ल्याएका र पठाएका मालवस्तुहरू अहिले  सहज तरिकाले छुट्न सकेका छ्रैनन् ।यस्ता सामानहरूले गोदाम नै भरिन लागेको छ  ।

तर भन्सार कर्मचारी र केही स्वार्थ समूहको स्वार्थ बाझिँदा र चलखेलका कारण त्रिभुवन विमानस्थल भन्सार कार्यालयमा भन्सार जाँचपासमा कठिनाइ भएको पीडितहरूको गुनासो छ ।यससम्बन्धमा त्रिवि भन्सार कार्यालयका उपसचिव शान्तिराम निरौँलासँग सम्पर्क गर्न खोज्दा सम्पर्क हुन सकेन् ।