काठमाडौँ । नयाँसडक बुलेटिनमा यहाँहरूलाई स्वागत छ। आज चैत ५ मंगलबार । यस्ता छन् दिनभरी घटेका मुख्यमुख्य आर्थिक समाचारहरू...

भन्सारसम्बन्धी कानुनको संशोधन र एकीकरण गर्न बनेको विधेयक, २०८० माथि छलफल

काठमाडौँ ।   प्रतिनिधिसभा, अर्थ समितिमा ‘भन्सारसम्बन्धी कानुनलाई संशोधन र एकीकरण गर्न बनेको विधेयक, २०८०’ माथि आज छलफल भएको छ ।

विधेयकमाथिको दफावार छलफलका क्रममा समितिले भन्सारका कर्मचारीलाई विभागीय कारबाहीको विषय हटाएको छ । भन्सार विभाग र मातहतका कार्यालयमा खटिने कर्मचारीलाई कारबाहीको विषय निजामती सेवा ऐन र भष्ट्राचार निवारण ऐनलगायतका कानुनले समेट्ने भएकाले भन्सार विधेयकमा यो विषय राख्न आवश्यक नरहेको विषयमा छलफल भएको समिति सभापति सन्तोष चालिसेले जानकारी दिनुभयो । 

समितिले विधेयकको दफा ९०, ९१ र ९२ हटाएको छ । यी दफामा कर्मचारीलाई विभागीय कारबाही गर्ने र हानीनोक्सानी भएको रकम भराइ दिनसक्ने व्यवस्था राखिएको थियो । भन्सार जाँचपास प्रक्रियालाई थप प्रविधिमैत्री र सहज बनाउन तथा नेपाल पक्ष राष्ट्र रहेको क्योटो महासन्धि अनुकूल हुनेगरी भन्सार ऐन संशोधन आवश्यक रहेको भन्दै सरकारले यो विधेयक ल्याएको हो ।

एन.सि.एग्रो टेक इन्डष्ट्रिजले आईपीओ निष्कासन गर्ने,  विक्री प्रबन्धकमा ग्लोबल आइएमई क्यापिटल

काठमाडौं । एन.सी.एग्रो टेक इण्ड्रष्ट्रिज लिमिटेडले सर्वसाधारणका लागि प्राथमिक सेयर (आईपीओ)निष्कासन गर्ने भएको छ । कम्पनीले अंकित मूल्य १०० रुपैयाँका दरको १८ लाख कित्ता साधारण सेयर निष्कासन गर्न लागेको हो ।

कम्पनीको आईपीओ निष्कासन तथा बिक्री प्रबन्धकमा ग्लोबल आईएमई क्यापिटल लिमिटेड नियुक्त भएको छ । एग्रो टेक इण्ड्रष्ट्रिजको तर्फबाट सञ्चालक दीपकप्रसाद न्यौपाने र ग्लोबल आईएमई क्यापिटलका तर्फबाट प्रमुख कार्यकारी अधिकृत मन्दीप लुइँटेलबीच सम्झौतापत्रमा हस्ताक्षर भएको छ ।

विसं ०७५ साल कात्तिक ११ गते कम्पनी रजिस्ट्रारको कार्यालयमा दर्ता भई सञ्चालनमा आएको एन।सी। एग्रो टेक इण्ड्रष्ट्रिजको केन्द्रीय कार्यालय टोखा नगरपालिका वडा नं। ०८, काठमाडौंमा पर्छ । उत्पादन क्षेत्र पूर्वनवलपरासी गैँडाकोट–१४, नवलपुरमा रहेको बताइएको छ ।

पियोर इनर्जी लिमिटेडको आइपीओमा माग भन्दा ८.९० गुणा बढी आवेदन

काठमाडौं । पियोर इनर्जी लिमिटेडले वैदेशिक रोजगारीमा गएका नेपालीका लागि बिक्री खुला गरेको आइपीओमा १२ करोड ८२ लाख ८२ हजार रुपैयाँ बराबरको आवेदन परेको छ । सीडीएसका अनुसार आज अन्तिम दिनसम्म ५६ हजार ४०२ जनाले १२ लाख ८२ हजार ८२० कित्ताका लागि आवेदन दिएका छन् । यो मागभन्दा ८.९० गुणा बढी आवेदन हो ।

काठमाडौँ ।नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संविधान संशोधनअघि बृहत् समीक्षा आवश्यक रहेको बताउनुभएको छ । २७औँ सांस्कृतिक प्रतिरोध दिवसका अवसरमा आज यहाँ आयोजित जनसांस्कृतिक राष्ट्रिय सम्मान–२०८१ कार्यक्रममा उहाँले अहिले संविधान संशोधनभन्दा पनि समीक्षाको बहस आवश्यक रहेको बताउनुभयो ।
 
 “संविधान समीक्षाको बहस चलाइयोस्, त्यो टुङ्गोमा पुगेपछि मात्रै संशोधन अघि बढाइनुपर्छ”, अध्यक्ष दाहालले भन्नुभयो, “सबै राजनीतिक दल र शक्ति मिलेर समीक्षा गरौँ, यसरी गरिने संशोधनले मात्रै सही आकार लिन सक्छ ।” जनताको सङ्घर्ष र बलिदानको बलमा स्थापित राजनीतिक उपलब्धि खोस्ने प्रयास स्वीकार्य नभएको उल्लेख गर्दै अध्यक्ष दाहालले त्यस्तो प्रयासलाई परास्त गरिने बताउनुभयो । “इतिहासमा सीमित भइसकेको राजतन्त्र पुनःस्थापना असम्भव छ”, उहाँले भन्नुभयो, “त्यसका लागि फेरि अर्को मूर्खता गर्नु उचित हुँदैन ।”

परराष्ट्रमन्त्रीद्वारा अमेरिकी राष्ट्रपति ट्रम्पका सुरक्षा निर्देशकसँग भेटवार्ता, विपिनको रिहाइका लागि पहल गरिदिन आग्रह

काठमाडौँ ।  परराष्ट्रमन्त्री डा आरजु राणा देउवाले अमेरिकी राष्ट्रपति डोनाल्ड ट्रम्पका राष्ट्रिय सुरक्षा सहायक तथा दक्षिण र मध्य एसियाका लागि राष्ट्रिय सुरक्षा परिषद्का वरिष्ठ निर्देशक रिकी गिलसँग नयाँ दिल्लीमा आज भेटवार्ता गर्नुभएको छ ।

भारतको विदेश मन्त्रालयद्वारा नयाँ दिल्लीमा आयोजित ‘राइसिना डायलग’ कार्यक्रमका लागि त्यहाँ रहनुभएका उहाँहरुबीच आज ‘साइडलाइन’  भेटवार्ता भएको हो ।

सो भेटवार्ताका क्रममा नेपाल–अमेरिका सम्बन्धका विविध विषयमा छलफल भएको परराष्ट्रमन्त्रीको सचिवालयले जनाएको छ । सो अवसरमा मन्त्री डा राणाले हमासको नियन्त्रणमा रहेका नेपाली विद्यार्थी विपिन जोशीको रिहाइका लागि पहल गरिदिन अमेरिकी सरकारसँग आग्रह गर्नुभयो । विपिनको रिहाइका लागि पहल गरिदिन यसअघि पनि आफूले अमेरिकी सरकारसँग आग्रह गरेको स्मरण गराउँदै उनको अझैसम्म रिहाइ हुन नसकेकाले सहयोगको अपेक्षा गरेको बताउनुभयो । 

एनआरएनए सचिवालयलाई सर्वोच्चको दोस्रो चेतावनीयुक्त पत्र,५ दिनभित्र आदेश कार्यान्वयन गर्न अल्टिमेटम

काठमाडौँ । गैरआवासीय नेपाली संघ (एनआरएनए)को सचिवालयलाई सर्वोच्च अदालतको फैसला कार्यान्वयन निर्देशनालयले चेतावनीयुक्त पत्र पठाएको छ । हाल बद्री केसी नेतृत्वको एनआरएनएले सचिवालयबाट काम कारबाही गर्दै आएकोमा निर्देशनालयले शेष घले नेतृत्वको उच्चस्तरीय समितिलाई उक्त कार्यालयको जिम्मा दिन यसअघि पत्राचार गरेपनि कार्यान्वयन नभएपछि मंगलबार दोस्रो चेतावनीयुक्त पत्र पठाएको हो । 
पत्रमा भनिएको छ, ‘....सर्वोच्च अदालतको २०८० चैत २१ को  आदेशलाई छल्ने/भाग्ने नियत देखिएकाले पुनः ५ दिनभित्र सम्मानित सर्वोच्च अदालतको उक्त आदेशलाई कार्यान्वयन गरी सोको जानकारी यस निर्देशनालयलाई दिनु होला ।’अन्यथा सर्वोच्च अदालत नियमावली बमोजिम कार्यविधिको कार्यान्वयन गर्ने पत्रमार्फत चेतावनी दिइएको छ । निर्देशनालयलाई फैसला आदेश कार्यान्वयनको क्रममा सहयोग गर्नु सचिवालयको कर्तव्य हुन आउने भन्दै पत्राचारलाई कार्यान्वयनको क्रममा बाधा, व्यवधान वा अटेर गरेमा अदालतको आदेशको अवज्ञा गरी कार्यपालना नगरेको व्यहोरासहितको प्रतिवेदन पेस गरिने पत्रमा उल्लेख छ ।

खुला बजारमा उद्योगीले मूल्य तोक्ने भन्दै मूल्य बढाउने उद्योगीहरूको पक्षमा उभिए उद्योगमन्त्री भण्डारी

काठमाडौँ ।  उद्योगमन्त्री दामोदर भण्डारीले संसदीय समितिमा उद्योगीहरूको पक्षमा आफू रहेको बताएका छन् ।संसदीय समितिका सदस्यहरूसँगको छलफलमा उद्योग मन्त्री भण्डारीले  यस्तो बताएका हुन् ।प्रतिनिधि सभाको उद्योग तथा वाणिज्य र श्रम तथा उपभोक्ता हित समितिको मंगलबार बसेको बैठकमा मन्त्री भण्डारीले खुला बजारमा वस्तुको भाउ उद्योगीले नै तोक्ने बताए।

आफ्नै पार्टीका सांसद समेतको आलोचना खेप्दै आएका मन्त्री भण्डारीले कार्टेलिङ गरी सिमेन्ट डण्डीको मूल्य बढाउने उद्योगीहरूको पक्षमा आफूलाई उभ्याएको देखिएको पर्यवेक्षकहरूको भनाइ छ ।भण्डारीले भने ‘अहिले हामी खुला बजारमा छ। वस्तुको मूल्य व्यवसायीले निर्धारण गर्छ। हामीले अवलम्बन गरेको कानुनी व्यवस्थाले यही भनेको छ ।सरकारको काम भनेको नीतिमा रहेको जटिलता हटाउने हो। वस्तुको मूल्य त बजारले नै निर्धारण गर्छ।’

सुन तस्करीका अभियुक्त कुसाङ लामा पुनः पक्राउ : २५ करोड रुपैयाँको विदेशी मुद्रा सहित

काठमाडौँ । सुन तस्करी प्रकरणमा पाँच वर्ष जेल बसेर छुटेका कुसाङ लामा पुनः पक्राउ परेका छन्। सिन्धुपाल्चोकको भोटेकोसी गाउँपालिका वडा नम्बर १ का ४३ वर्षीय लामा, जो ुफुच्चेु नामले परिचित छन्, मंगलबार काठमाडौँ उपत्यका अपराध अनुसन्धान कार्यालयको टोलीले पक्राउ गरेका हुन्। प्रहरीले प्राप्त गरेको सूचनाका आधारमा, रसुवा नाका हुँदै ट्रकमा युरो र अमेरिकन डलरसहित विदेशी मुद्रा नेपालतर्फ ल्याउँदै गरेको अवस्थामा उनलाई पक्राउ गरिएको हो। कुसाङ लामाबाट बरामद भएको विदेशी मुद्रा नेपाली रकममा कन्भर्ट गर्दा करिब २५ करोड १ लाख ६० हजार ३३८ रुपैयाँका बराबरको रकम आउँछ। प्रारम्भिक अनुसन्धानबाट लामा भरियाको रूपमा चालकको काम गर्दै थिए भन्ने खुलासा भएको छ।

प्रहरी महानिरीक्षकद्वारा पदबहाली, देशको शान्तिसुरक्षा प्रमुख प्राथमिकता

काठमाडौँ । प्रहरी महानिरीक्षक दीपक थापाले आज अपराह्नदेखि कार्यभार सम्हाल्नुभएको छ । पद बहालीसँगै उहाँले मुलुकको शान्ति सुरक्षा आफ्नो प्रमुख प्राथमिकता भएको स्पष्ट गर्नुभएको छ ।  

मन्त्रिपरिषद्को सोमबारको निर्णयअनुसार उक्त पदमा पदोन्नति पाउनुभएका उहाँलाई आजै गृहसचिव गोकर्णमणि दुवाडीले दज्र्यानी चिह्नबाट सुशोभन गर्नुभएको थियो ।

त्यस अवसरमा गृहसचिव दुवाडीले गौरवशाली सङ्गठनको प्रमुख जस्तो गरिमामय पद प्राप्त गर्नुभएकामा प्रहरी महानिरीक्षक थापालाई हार्दिक बधाई तथा सफल कार्यकालको  सफलताको कामना गर्नुभयो ।

काठमाडौँ विश्वविद्यालयका नवनियुक्त उपकुुलपतिको शपथ

काठमाडौँ ।प्रधानमन्त्री एवं काठमाडौँ विश्वविद्यालयका कुलपति केपी शर्मा ओलीसमक्ष उक्त विश्वविद्यालयका नवनियुक्त उपकुलपति प्राडा अच्युुतप्रसाद वाग्लेले आज पद तथा गोपनीयताको शपथ लिनुभएको छ ।

प्रधानमन्त्री तथा मन्त्रिपरिषद्को कार्यालयमा आयोजित कार्यक्रममा उपकुलपति डा वाग्लेले शपथ लिनुभएको हो । कुलपति ओलीले विश्वविद्यालयको रिक्त उपकुलपति छनोटका लागि गठित खोज तथा सिफारिस समितिको सिफारिसका आधारमा डा वाग्लेलाई सो विश्वविद्यालयको ऐन, २०४८ को दफा १३ ९४० बमोजिम सोमबार नियुक्त गर्नुभएको हो ।

प्रधानमन्त्री ओलीले उपकुलपति नियुक्तिमा हुन पुगेको ढिलाइको सन्दर्भसमेतलाई ध्यान दिएर आगामी दिनमा सजगताका साथ सम्बन्धित सबै पक्षको साझा विश्वविद्यालय बनाउने गरी काम अघि बढाउन शुभकामना दिनुभयो ।

बाँकेका ६९ ‘फर्म’कारबाहीमा १० लाख जरिवाना असुल

नेपालगन्ज। वाणिज्य, आपूर्ति तथा उपभोक्ता संरक्षण कार्यालयले चालू आर्थिक वर्षको आठ महिनामा ६९ वटा व्यावसायिक फर्मलाई कारबाही गरेर रु १० लाख ५० हजार जरिवाना गरेको छ । सो अवधिमा उक्त कार्यालयका प्रमुख हरिबहादुर खत्रीले इजाजत नलिएको, म्याद गुज्रेका वस्तुको बेचविखन गरेको, मूल्यसूची नराखेकोलगायत कसुरमा ती फर्मलाई कारबाही गरिएको जानकारी दिनुभयो ।

वीरगञ्ज सुक्खा बन्दरगाह आउन थाल्यो ट्याङ्क कन्टेनर,ढुवानी सस्तो हुने

काठमाडौँ । ढुवानी सस्तो हुने भएर वीरगञ्ज सुक्खा बन्दरगाहमा ट्याङ्क कन्टेनर आउन  सुरु भएको  छ। आइतबारदेखि कच्चा तेल बोकेको कन्टेनर रेल सुक्खा बन्दरगाहमा आउन थालेको  हो।

बाराको जीतपुरस्थित खाने तेल उत्पादक उद्योग शिवशक्ति प्रा लिले खरिद गरेको सोयाबिन तेलको कच्चा पदार्थ (कच्चा तेल) बोकेको ट्याङ्क कन्टेनर सुक्खा बन्दरगाहमा आएको हो।

२० फुटे ९० वटा ट्याङ्क कन्टेनरमा २० हजार मेट्रिक टन कच्चा तेल अर्जेन्टिनाबाट हल्लिया हुँदै पहिलो पटक वीरगञ्ज सुक्खा बन्दरगाह मार्फत नेपाल भित्रिएको जनाइएको छ।
सडक मार्गबाट मात्र ढुवानी हुँदै आएको कच्चा तेल रेलबाट ढुवानी गर्दा सडकमार्गको तुलनामा ढुवानी भाडामा औसत १५ प्रतिशत बचत हुने तेल आयात कम्पनीका पदाधिकारीले बताए।

हतियार देखाएर लुटपाटमा संलग्न फरार आरोपित पक्राउ

काठमाडौँ । प्रहरीले १० वर्षदेखि चोरी गर्दै आएको आरोपित एक व्यक्तिलाई पक्राउ  गरेको छ ।पक्राउ पर्नेमा नुवाकोटको बेलकोटगढी नगरपालिका–१२ घर भई ललितपुर महानगरपालिका–१३ धापाखेल कर्मनाशा बस्ने ३० वर्षीय विक्रम न्यौपाने हुन् ।

काठमाडौँ उपत्यका अपराध अनुसन्धान कार्यालयको टोलीले उनलाई सोमबार दिउँसो भाग्दै गरेको अवस्थामा पक्राउ गरेको जनाइएको छ ।यसअघि लामो समयदेखि प्रहरीको खोजीमा रहे पनि उनी पक्राउ पर्न सकेका थिएनन् ।

अपराध अनुसन्धान कार्यालयको ललितपुरस्थित शाखा कार्यालय जावलाखेलको टोलीले धापाखेलबाट उनलाई पक्राउ गरेको हो । पक्राउ परेका उनलाई थप अनुसन्धानका लागि प्रहरी वृत्त सातदोबाटो पठाइएको छ ।

क्रेस्ट माइक्रो लाइफ इन्स्योरेन्सको आईपीओ बाँडफाँट

काठमाडौ । क्रेस्ट माइक्रो लाइफ इन्स्योरेन्स लिमिटेडले फागुन २२ गतेदेखि २६ गतेसम्म निष्काशन तथा विक्री खुला गरेको आईपीओ मंगलबार  बाँडफाँट भएको छ । आईपीओ विक्री प्रबन्धक एनआईएमबी एस क्यापिटलको कार्यालयमा बाँडफाँट भएको हो । 

कम्पनीले प्रतिकित्ता १०० रुपैयाँका दरले १८ लाख ४५ हजार कित्ता शेयर सर्वसाधारणका लागि विक्री खुलाएको थियो । जसमा १९ लाख ६५ हजार ८११ जनाले आवेदन दिएका थिए ।

आवेदन दिएका १९ लाख ५५ हजार ६८५ जनामध्ये १ लाख ८४ हजार ५ सय जनालाई १०–१० कित्ताका दरले शेयर पाएका छन् भने बाँकीको हात खाली भएको छ । त्यस्तै १० हजार १२६ जनाको आवेदन रद्द भएको छ ।

होन्डुरसको टापुबाट उडेको सानो विमान दुर्घटना हुँदा कम्तीमा ७ जनाको मृत्यु

टेगुसिगाल्पा । होन्डुरसको क्यारेबियन टापु रोआटानबाट उड्ने क्रममा सोमबार एउटा सानो विमान समुद्रमा दुर्घटना हुँदा कम्तीमा सात जनाको मृत्यु भएको अधिकारीहरूले बताएका छन् ।

दमकल विभागका मेजर विल्मर गुरेरोले पत्रकारहरूलाई दुर्घटनास्थलबाट १० जनालाई निकालिएको र तीमध्ये ६ जनालाई अस्पतालमा मृत घोषित गरिएको बताउनुभयो ।

त्यसपछि समुद्रमा विमान नजिकै एक चालक दलको सदस्यको शव तैरिरहेको फेला परेको थियो । उक्त विमान किनारबाट करिब एक किलोमिटर टाढा दुर्घटनामा परेको थियो ।

प्रभु महालक्ष्मीको २ लाख ७४ हजार कित्ता संस्थापक सेयर बिक्रीमा

काठमाडौ ।  प्रभु महालक्ष्मी लाइफ इन्सुरेन्सले संस्थापक सेयरधनीहरुको नाममा रहेको २ लाख ७४ हजार २०१ कित्ता संस्थापक सेयर बिक्रीमा ल्याएको छ । यसमा कम्पनीका संस्थापक सेयरधनी, अन्य जो कोही व्यक्ति वा संघ संस्थाले आवेदन दिन सक्नेछन् । 

सेयर खरिद गर्न इच्छुकले आजबाट ७ दिन भित्र कम्पनीको केन्द्रीय कार्यालय, कमलादी, काठमाडौंमा के कति सेयर खरिद गर्ने सोको व्यहोरा खुलाइ आवेदन दिनु पर्नेछ ।

कुमारी बैंकको ५ लाख ८७ हजार कित्ता संस्थापक सेयर बिक्रीमा

काठमाडौ । कुमारी बैंकले संस्थापक सेयरधनीको नाममा रहेको ५ लाख ८७ हजार १२ कित्ता संस्थापक सेयर बिक्रीमा ल्याएको छ । जसमा २ लाख कित्ता सेयरमा बैंकका विद्यमान अन्य संस्थापक सेयरधनीले आवेदन दिन सक्नेछन् । 

 २ लाख ८७ हजार १२ कित्ता सेयरमा अन्य व्यक्ति तथा संघसंस्थाले खरिद आवेदन दिन सक्नेछन् ।  सेयर खरिद गर्न इच्छुकले आज ९चैत ५ गते० बाट ३५ दिन भित्र बैंकको प्रधान कार्यालय, टंगाल वा कुमारी क्यापिटलको कार्यालय नक्साल नागपोखरी, काठमाडौंमा आवेदन दिनु पर्नेछ ।

सिटिजन्स बैंकको ४० हजार कित्ता संस्थापक सेयर बिक्रीमा

काठमाडौं ।  सिटिजन्स बैंक इन्टरनेसनल लिमिटेडले संस्थापक सेयरधनीको नाममा रहेको ४० हजार कित्ता संस्थापक सेयर बिक्री खुला गरेको छ । बैंकले प्रतिकित्ता सेयरको न्यूनतम भाउ १० रुपैयाँ तोकेको छ । यसमा बैंकका विद्यमान अन्य संस्थापक सेयरधनीले आवेदन दिन सक्नेछन् । 

सेयर खरिद गर्न इच्छुक संस्थापकले आज शुक्रबारबाट ३५ दिन भित्र बैंकको केन्द्रीय कार्यालय नारायणहिटी पथमा निवेदन पेश गर्नु पर्नेछ ।

राजस्व अनुसन्धान विभागले भन्सार जाँचपास भएका मालवस्तु नियन्त्रणमा लिएपछि  त्रिविस्थल भन्सार कार्यालयका कर्मचारीहरू बीच  बबण्डर, काम नै ठप्प

काठमाडौँ । त्रिभुवन विमानस्थल भन्सार कार्यालयले भन्सार चेकजाँच गरी छाडेका मालवस्तु राजस्व अनुसन्धान विभागले  पक्राउ गरेपछि विमानस्थल भन्सार कार्यालयमा बबण्डर मच्चिएको छ । पीआरसी इन्टरप्राइजेजका सञ्चालक पर्शुराम चौधरीले ल्याएका कपडा तथा मालवस्तुहरू त्रिवि भन्सार कार्यालयले चेकजाँच गरी छाडेको थियो । उक्त मालवस्तु राजस्व अनुसन्धान कार्यालयले नियन्त्रणमा लिएर अनुसन्धान गरिरहेको छ ।

पीआरसी इन्टरप्राइजेजले ल्याएका कपडा, चश्माका फ्रेमहरू अहिले पनि राजस्व अनुसन्धान विभागको प्राङ्गणमा अनुसन्धानको क्रममा छन् । यसअघि पनि पटक पटक एयरपोर्ट भन्सार कार्यालयबाट छुटेका मालवस्तु राजस्व अनुसन्धान विभागले नियन्त्रणमा लिएर थप अनुसन्धान र  कारबाही गर्दै आएको थियो । राजस्व अनुसन्धान विभागले एयरपोर्ट भन्सार कार्यालयबाटै आएका ड्रोनहरूको आयात र कारोबारहरूमा ठूलो मात्रामा राजस्व छली भएको आशंकामा एक फर्ममा छापा हानेको छ । छापा हानेर राजस्व अनुसन्धान विभागले उक्त फर्मको कारोबारसम्बन्धी कागजात ,मोबाइल र कम्प्युटर नियन्त्रणमा लिएको छ ।

सुनको मूल्य हालसम्मकै महँगो, प्रतितोला १ लाख ७५ हजार २ सय रुपैयाँ पुग्यो

काठमाडौं । आज नेपाली बजारमा मंगलबार सुनको मूल्यले नयाँ रेकर्ड तोडेको छ । आज मंगलबार सुन प्रतितोला ११ सय रुपैयाँले  बढेर प्रतितोला १ लाख ७५ हजार २ सय रुपैयाँ पुगेको छ । सोमबार १ लाख ७४ हजार १ सय रुपैयाँ थियो ।
यसअघि गत शुक्रबार सुनको मूल्यले १ लाख ७४ हजार ५ सय रुपैयाँको उच्च रेकर्ड बनाएको थियो । चाँदीको भाउ पनि तोलामा १० रुपैयाँ बढेको छ । सोमबार प्रतितोला २ हजार ४० रुपैयाँ रहेको चाँदी आज २ हजार ५० रुपैयाँ पुगेको छ ।

आजको मौसम : पश्चिमी वायुको आंशिक प्रभाव

काठमाडौँ ।हाल देशमा पश्चिमी वायुको साथै स्थानीय वायुको समेत आंशिक प्रभाव रहेको छ । हाल कोशी, मधेस र  बागमती प्रदेशमा आंशिक बदली रही बाँकी भू–भागमा मौसम सफा रहेको जल तथा मौसम विज्ञान विभागले जनाएको छ ।

विभागका अनुसार आज दिउँसो देशभर आंशिक बदलीदेखि मौसम मुख्यतया सफा रहने छ । गण्डकी प्रदेशका पहाडी भू–भागका एक–दुई स्थानमा मेघगर्जन र चट्याङसहित हल्का वर्षा तथा उच्च पहाडी तथा हिमाली भागका एक–दुई स्थानमा हल्का हिमपातको सम्भावना छ । कोशी र मधेस प्रदेशका केही स्थानमा हुरीबताससमेत चल्ने सम्भावना छ ।

यस्तो छ आजका लागि निर्धारित विदेशी मुद्राको विनिमय दर

काठमाडौँ ।नेपाल राष्ट्र बैंकले आजका लागि विदेशी मुद्राको विनिमय दर निर्धारण गरेको छ । राष्ट्र बैंकका अनुसार अमेरिकी डलर एकको खरिदर १३८ रुपैयाँ ५९ पैसा र बिक्रीदर १३९ रुपैयाँ १९ पैसा कायम भएको छ । 

युरोपियन युरो एकको खरिदर १५१ रुपैयाँ १२ पैसा र बिक्रीदर १५१ रुपैयाँ ६६ पैसा, युके पाउण्ड स्ट्रलिङ एकको खरिदर १७९ रुपैयाँ ७८ पैसा र बिक्रीदर १८० रुपैयाँ ५६ पैसा, स्विस फ्र्याङ्क एकको खरिददर १५७ रुपैयाँ ०२ पैसा र बिक्रीदर १५७ रुपैयाँ ७० पैसा कायम गरिएको छ । 

अष्ट्रेलियन डलर एकको खरिददर ८८ रुपैयाँ ०० पैसा र बिक्रीदर ८८ रुपैयाँ ३९ पैसा, क्यानेडियन डलर एकको खरिदर ९६ रुपैयाँ ५८ पैसा र बिक्रीदर ९७ रुपैयाँ ०० पैसा, सिङ्गापुर डलर एकको खरिददर १०४ रुपैयाँ ०६ पैसा र बिक्रीदर १०४ रुपैयाँ ५१ पैसा निर्धारण गरिएको छ ।