काठमाडौँ । राजस्व अनुसन्धान कार्यालय बुटवलद्वारा भेप तस्करीमा संलग्नहरूलाई राजस्व चुहावट कसुरमा मुद्दा दायर गरिएको छ ।छब्बिस सय भेप तस्करी गरी राजस्व चुहावट गरेको कसुरमा डाइमण्ड इन्टरनेशनलका प्रोपराइटर सुमन पराजुलीसहित ४ जना विरुद्ध मुद्दा दायर गरिएको हो ।  

राजस्व अनुसन्धान कार्यालय, बुटवल रुपन्देही मार्फत एल्फबार राया डी थ्री डिस्पोजेबल पोड डिभाइस(भेप) को अवैध कारोबार गरी राजस्व चुहावट गरेको कसुरमा उनीहरू विरुद्ध मुद्दा दायर गरिएको छ  । राजस्व अनुसन्धान कार्यालय बुटवलका प्रमुख विवेक घिमिरेका अनुसार   छब्बिस सय भेप तस्करी  सम्बन्धमा अनुसन्धान सम्पन्न गरी प्रतिवादी काठमाडौँ डाइमण्ड इन्टरनेशनलका प्रोप्राइटर सुमन पराजुली समेत ४ जना विरुद्द उच्च अदालत तुलसीपुर, बुटवल इजलासमा अभियोग पत्र दायर गरिएको छ । डाइमण्ड इन्टरनेशनलको  बिल प्रयोग गरी तशनिम जनरल स्टोर नेपालगञ्ज बाँकेलाई बेचेको देखाइ १०० वटाको बिल काटी २६०० भेप भेरी ढुवानी सेवाको साधन प्रयोग गरी नेपालगञ्ज  पठाउने र त्यहाँबाट महँगोमा बेच्नको लागि भारततर्फ तस्करी हुने गरेको अनुसन्धानबाट खुलेको कार्यालय प्रमुख घिमिरेले नयाँ सडकलाई बताए । 

किन्ने र बेच्ने फर्महरुका तर्फबाट फर्मवालालाई मुख्य प्रतिवादी बनाइएको राजस्व अनुसन्धान विभागको विज्ञप्तिमा जनाइएको छ । उनीहरुलाई राजस्व चुहावट (अनुसन्धान तथा नियन्त्रण) ऐन, २०५२  को दफा ३ ले निषेध गरेको कार्य गरी ऐ.ऐ. ऐनको दफा ४ को खण्ड (ख), (छ), (झ) बमोजिमको कसुर गरेकाले निज प्रतिवादीहरु सुमन पराजुली र तश्निम जनरल स्टोरका हसिमुन जोलाहलाई बैसठ्ठी लाख एकहत्तर हजार छ सय छयहत्तर रुपैया बिगो कायम गरी ऐ.ऐ. ऐनको दफा २३ (१) बमोजिम मालवस्तु (बिगो) जफत हुन तथा बिगो बमोजिमको जनही बैसठ्ठी लाख एकहत्तर हजार छ सय छयहत्तर रुपैया जरिवाना हुन र ऐ.ऐनको दफा २३(१)(क) बमोजिम हदै सम्मको कैद सजाय हुन मागदाबी लिई उच्च अदालत तुलसीपुर, बुटवल इजलासमा अभियोगपत्र दायर गरिएको उक्त विज्ञप्तिमा जनाइएको छ ।

साथै सोही मुद्दामा प्रतिवादीहरु डाइमण्ड इन्टरनेशनलका तर्फबाट तस्करीमा सघाउने रोजन न्यौपाने र तशनिम जनरल स्टोर नेपालगञ्ज बाँकेका तर्फबाट कारोबारी सनाउल्ला अन्सारीले उक्त मालवस्तुको ओसारपसारमा मुख्य कारोबारीको सहयोगी भएर फर्म तथा बिलहरुको समेत दुरुपयोग गर्दै राजस्व चुहावटको कसूरको मतियारको भूमिका निर्वाह गरेको देखिँदा राजस्व चुहावट (अनुसन्धान तथा नियन्त्रण) ऐन, २०५२ को दफा २३को उपदफा (३) बमोजिम मुख्य प्रतिवादीलाई हुने सजायको आधा सजाय र मुख्य प्रतिवादीलाई हुने जरिवानाको आधा जरिवानाले हुने जनही एकतिस लाख पैँतिस हजार आठसय अठतिस रुपैयाँ  मागदाबी लिई उक्त अभियोगपत्र दायर गरिएको राजस्व अनुसन्धान विभागका उपनिर्देशक तथा प्रवक्ता कृष्णकुमारी श्रेष्ठ हस्ताक्षरित विज्ञप्तिमा जनाइएको छ ।  

मुख्य प्रतिवादी बनाइएका पराजुली र जोलाहलाई पटक पटक पत्राचार गरी सम्पर्क गर्न खोज्दा समेत सम्पर्कमा नआएको र हालसम्म पनि फरार रहेका छन भने   कारोबारमा संलग्न मतियारहरुलाई  भने करिब ९० दिनदेखि हिरासतमा राखी अनुसन्धान गरिएको जनाइएको छ ।  निजहरु बीच पटक पटक दोहोरो तेहोरो सम्पर्क भएको तथा अधिकारिक कारोबारको अभिलेख नभेटिएको तथा बेच्नेले कहीँबाट खरिद गरेको स्रोत समेत प्रस्तुत गर्न सकेको अवस्था नरहेको कार्यालयले जनाएको छ।

विगतदेखि भेप कारोबार, तस्करी  र ओसारपसार बाक्लिएको र यसैको शृंखलाको  रुपमा राजस्व अनुसन्धान विभागबाट एक लाख भन्दा बढी भेप विभिन्न ठाँउबाट बरामद गरी कारबाही भइरहेको छ। भेप तस्करीमा अनुचित तथा गैरकानुनी फाइदा धेरै रहेको कारण यसमा अकर्षण बढेको हुन सक्ने अनुसन्धानकर्ताको आशंका छ । साथै   कानूनी प्रक्रिया पुरा गरी भन्सार गरेर ल्याउन पाउने भए पनि ४०% भन्सार, ४०% अन्तशुल्क र १३% मुल्य अभिवृद्धि कर गरी ९३% कर लाग्ने र खरिद मुल्यको झन्डै दोब्बर मुल्य पर्ने भएकोले पनि करछली गर्ने तर्फ तस्करहरु जोखिम उठाउन थालेको देखिएको जनाइएको छ । कर प्रशासनमा विभिन्न प्रकारका भेपलाई कर संवेदनशील वस्तुका रुपमा लिने गरिएको छ।