काठमाडौँ । नेपाल कफी फेस्टिभल एण्ड च्याम्पियनसिप२०८१को आयोजना हुने भएको छ । चैत २१गतेदेखि २३गतेसम्म ललितपुरको सानेपास्थित हेरिटेज गार्डेनमा हुने भएको हो ।नेपाल कफी व्यवसायी महासंघले अवसरको खोजी गर्न , ज्ञान बाँड्न र नेपालमा कफी क्षेत्रको विकास प्रवद्र्धन गर्न नेपाल कफी फेस्टिभल एण्ड च्याम्पियनसिप २०८१को आयोजना गरिएको जनाएको हो । 

कफीको आन्तरिक एवं बाह्य बजार प्रवद्र्धन गर्न, कफी क्षेत्र विकास प्रवद्र्धन गर्न, उद्यमी व्यवसायीको आफ्ना उत्पादनहरू, सेवाहरूको प्रदर्शनी, कफीको राष्ट्रिय विद्यागत प्रतिस्पर्धा र पुरस्कार(क्याफे बारिस्ता, लाते आट र ब्रुइङ्ग)लगायत कफीको मूल्य शृङ्खला अनुरुप विविध विषयका वर्तमान अवस्था र वस्तुस्थितिलाई सम्बोधन हुने गरी लगानी मैत्री वातावरण तय गर्दै सरकार सम्बद्ध सम्पूर्ण मन्त्रालयहरू,राष्ट्रिय चिया तथा कफी विकास बोर्ड र व्यापार तथा निकासी प्रवद्र्धन केन्द्रसँग सहकार्य एवं समन्वय गरी यस कार्यक्रमको आयोजना गर्न लागिएको महासंघले जनाएको छ ।
 
नेपाल कफी फेस्टिभल एण्ड च्याम्पियनसिप २०८१  नेपाल सरकार उद्योग वाणिज्य तथा आपूर्ति मन्त्रालय , कृष तथा पशुपन्छी विकास मन्त्रालय, राष्ट्रिय चिया तथा कफी विकास बोर्ड , नेपाल पर्यटन बोर्ड युरोपियन युनियन तथा कफी क्षेत्र उद्योग सम्बन्धित व्यवसायहरूको सहकार्य एवं समन्वमा आयोजना हुन लागेको हो ।

नेपाल कफी फेस्टिभल एण्ड च्याम्पियनसिप२०८१को आयोजनाका मुख्य आकर्षणहरू यस प्रकार रहेका छन् ।
१.प्रदर्शनी ः प्रदर्शनीले कफी उत्पादकहरू, उपकरण निर्मार्ताहरू, निर्यातकर्ताहरू, र अन्य कफी क्षेत्र उद्योग सम्बन्धित व्यवसायहरूलाई आफ्ना उत्पादनहरू प्रदर्शन गर्ने अवसर प्रदान गर्नेछ । आगन्तुकहरूले कफीका परिकारहरू, कृषि तथा क्याफे स्थापनाका लागि आवश्यक मेसिनरीहरू, रोस्टिङ प्रविधिहरू, प्याकेजिङ सामानहरू अवलोकन गर्ने अवसर पाउनेछन् । 

२.कफीको स्वाद र प्रतियोगिताहरूः सहभागीहरूले नेपाली कफीको स्वादहरू लिन सक्छन् , जहाँ उनीहरूले नेपालमा उत्पादित स्पेस्यिालिटी कफीको स्वाद लिने मौका पाउनेछन् ।साथै सम्मेलनले कफीको विभिन्न प्रतिस्पर्धालाई प्रोत्साहन गर्दै विभिन्न विधाहरूमा – क्याफे वारिस्ता , लाते आट र ब्रुइङ) उत्कृष्टताको पहिचान र पुरस्कृति गर्न कफी प्रतियोगिताहरू आयोजना गर्नेछ ।

३. नेटवर्किङ अवसरः कफीको मूल्य शृङ्खला अनुरुप विविध विषयका वर्तमान अवस्था र वस्तुस्थितिलाई सम्बोधन हुने गरी लगानी मैत्री वातावरण तय गर्न यस सम्मेलनले महत्वपूर्ण भूमिका खेल्ने छ । यसले कफी उत्पादकहरूलाई राष्ट्रिय र अन्तर्राष्ट्रिय उद्यमी व्यवसायीहरूसँग सम्पर्क स्थापित गर्न र बजार पहुँच विस्तार गर्न अवसरहरू सिर्जना गर्न महत्वपूर्ण भूमिका खेल्नेछ । 

नेपाल कफी फेस्टिभल एण्ड च्याम्पियनसिप२०८१ले नेपालको कफी वृद्धिलाई बढावा दिने , नेपाली कफीको अन्तर्राष्ट्रिय मान्यतालाई बलियो बनाउने र कफी उत्पादक क्षेत्रहरूमा आर्थिक विकास र सामाजिक उत्थानका लागि अवसरहरू सिर्जना गर्ने परिवर्तनकारी कार्यक्रम हुनेछ । यसले ज्ञान साझेदारी , सहयोग र नवीनताको लागि अवसरहरू सिर्जना गर्नेछ । अन्ततः संलग्न सबै सरोकारवालाहरूलाई फाइदा प्रदान गर्ने जारी विज्ञप्तिमा जनाइएको छ ।