Apr 03 2025 | २०८१, चैत २१गते
काठमाडौँ । मोबाइल बैंकिङ, वालेट तथा कनेक्ट आईपीएसबाट ५ सय रुपैयाँसम्मको रकम ट्रान्सफरमा शुल्क नलाग्ने भएको छ।नेपाल क्लियरिङ हाउस (एनसीएचएल) ले शुल्क परिमार्जन गरी यस्तो जनाएको हो । हाउसले यस किसिमको व्यवस्था लागु गरेको बुधबार सूचना प्रकाशन गर्दै जानकारी दिएको छ ।
रिटेल पेमेन्ट स्विच (आरपीएस) प्रणालीमा लाग्ने शुल्क परिमार्जन गर्दै कारोबार रकम सीमाका आधारमा लागु हुने जनाइएको छ । यसअनुसार मोबाइल बैंकिङ, कनेक्ट आईपीएसको मोबाइल एप तथा वेबसाइट र वालेटमा रकम राख्दा वा झिक्दा ५ सय रुपैयाँसम्मको रकम ट्रान्सफरमा कुनै पनि शुल्क नलाग्ने भएको हो ।
यी माध्यमबाट ५ सयदेखि ५ हजार रुपैयाँसम्म ट्रान्सफर गर्दा ४ रुपैयाँ र ५ हजारमाथिका हकमा ८ रुपैयाँ शुल्क लाग्ने जनाइएको छ । त्यस्तै क्रेडिटर तथा मर्चेन्ट भुक्तानीमा समेत शुल्क लाग्ने व्यवस्था गरिएको छ ।यस अनुसार मर्चेन्ट भुक्तानीका हकमा ५ सय रुपैयाँसम्म २ रुपैयाँ, ५ सय देखि ५ हजारसम्मको भुक्तानीमा ४ रुपैयाँ र ५ हजारभन्दा माथिको भुक्तानीमा ८ रुपैयाँ शुल्क तोकिएको छ ।
सेवा प्रदायक तथा मर्चेन्टले शुल्क बेहोरेको कारोबारमा रकम पठाउन ग्राहकलाई कुनै शुल्क नलाग्ने एनसीएचएलले जनाएको छ ।कारोबार संख्यामा वृद्धि भएसँगै कारोबार शुल्क समायोजन गर्ने नीति एनसीएचएलले लिँदै आएको छ । आरपीएस मार्फत गत आर्थिक वर्ष ५ हजार ६ सय ९७ अर्ब बराबरको ७ करोड ५६ लाख भुक्तानी कारोबार फछ्र्योट गरेको थियो । यसैगरी चालू आव ८ महिनामा ४ हजार ५ सय ५३ अर्ब बराबरको ६ करोड ८३ लाख भुक्तानी कारोबार फछ्र्योट गरिसकेको छ ।हाल ५२ बैंक वित्तीय संस्थाहरूको मोबाइल बैंकिङ एपमा आरपीएस र कनेक्ट आइपीएसबाट फन्ड ट्रान्स्फर गर्न सकिने सेवा उपलब्ध छ । साथै १३ भन्दा बढी वालेटमा बैंक खाताबाट क्यास इन र क्यास आउट सेवा उपलब्ध छ ।
© 2025 All right reserved to Nayasadak.com | Site By : Sobij
