काठमाडौँ  । राजस्व अनुसन्धान विभागले काठमाडौंको टोखास्थित झोरमा ट्रकमा भेटिएको २५ करोड बराबरको डलर र युरोको मालिकको पहिचान गरिएको जनाएको  छ । इन्टिलिजेन्स र विज्ञ अनुसन्धानबाट शंका गरिएका व्यक्तिको पहिचान खुलेको जनाइएको हो ।  अनुसन्धान विभाग अुनसार उक्त सिन्धुपाल्चोकको भोटेकोशी गाउँपालिका–४ स्थायी घर भई टोखा नगरपालिका–१० बस्ने नारायण पौडेलको रहेको खुलेको छ ।गत चैत ४ गते राति ना ७ ख १६५२ नम्बरको ट्रकमा लुकाएर लाँदै गरेको अवस्थामा सिन्धुपाल्चोकका ४३ वर्षीय कुसाङ लामालाई पक्राउ गरिएको  थियो । भोटेकोशी गाउँपालिका–१ का लामाले चालक सिट पछाडि फल्स बटम बनाएर रकम राखेको अवस्थामा  पक्राउ गरिएको  थियो ।चालक लामाको बैंक खाताको विवरण हेर्दा अस्वभाविक कारोबार देखिएको  जनाइएको छ । जसको सीडीआर विश्लेषणबाट पौडेलको मोबाइलमा अन्तिम पटक सम्पर्क भएको  अनुसन्धानबाट खुलेको छ । 

राजस्व अनुसन्धान विभागले जनाए अनुसार मिति २०८१/१२/०४ गते राति अ. २३ः०० बजेको समयमा काठमाडौं जिल्ला, टोखा न.पा. वडा नं. २ झोर स्थित सडकमा टोखादेखि झोरतर्फ जाँदै गरेको अवस्थामा कुसाङ लामाले चलाएको ना ७ ख. १६५२ नं. को कन्टेनर (ट्रक) काठमाडौं उपत्यका अपराध अनुसन्धान कार्यालय, टेकु काठमाडौंबाट खटिई गएको टोलीले नियन्त्रणमा लिई ट्रकको खानतलासी गर्दा चालक बस्ने स्थानदेखि माथिको क्याबिनमा फल्स बटम बनाई लुकाई राखेको खैरो  रंगको टेपले बोको अवस्थामा युरो ५००,२००,१०० १५० दरको जम्मा तेह्र लाख पचहतर हजार एक सय पचास अमेरिकी डलर १०० र  ५० दरको जम्मा तीन लाख बीस हजार आठ सय पचास विदेशी मुद्राहरु बरामद भई अनुसन्धान प्रयोजनार्थ बरामदित विदेशी मुद्रा र निज कुसाङ लामा सहित काठमाडौं उपत्यका अपराध अनुसन्धान कार्यालय, टेकु, काठमाडौंको च.न. १६४२६, मिति २०८१/१२/०५ गतेको पत्रासाथ यस विभागमा दाखिला भई अनुसन्धान कार्य अगाडि बढेको छ । वारदात पश्चात विभागले प्रयोग गरेको इन्टेलिजेन्स  र विज्ञ अनुसन्धान टोलीबाट मुख्य शंकित दुर्गा प्रसाद पौडेलको नाति कुल बहादुर पौडेलको छोरा सिन्धुपाल्चोक जिल्ला साविक फुल्पिङकट्टि वडा नं.०४ हाल भोटेकोशी गा.पा. वडा नं.०४ स्थायी वतन भई हाल का.जि.टोखा न.पा. वडा नं. १० महादेवटार हाईट बस्ने नारायण पौडेल (ना.प्र.प.नं. ९८३/०७/११८४–जारी मिति २०४६/०१/२१) को पहिचान गरिएको राजस्व अनुसन्धान विभागले जनाएको छ । 

अदालतबाट पक्राउ पूर्जी जारी भई निजलाई पक्राउ गरी यस विभागमा दाखिला गर्न नेपाल प्रहरीलाई पत्राचार गरिएको, निजले प्रयोग गर्ने मोबाइल नम्बरको सीडीआर  विश्लेषण गरिएको, सीसीटीभी फुटेज डिजिटल डिभाइसको विश्लेषण, प्रतिवादी नारायण पौडेलको घर, कारोबार स्थल, गोदामहरु खानतलासी गरी विभिन्न दशी बरामद गरिएको, विभागले जनाउँदै २५ करोड भेटिएको मालिक नारायण पौडेल भएको जनाएको हो ।

विभागले जनाए अनुसार  बरामदित ना ७ ख. १६५२ नं. को कन्टेनर (ट्रक) वारदात अगाडि ग्यारेज, पार्किङ्ग स्थल र विभिन्न गोदामहरुमा गएको देखिएको र उक्त स्थानहरुमा खानतलासी गरी विभिन्न दशीहरु बरामद भएको, प्रतिवादी कुसाङ लामाको बैंक खाताको विवरणबाट अस्वभाविक शंकास्पद कारोबार भएको र सीडीआर विश्लेषणबाट प्रतिवादी नारायण पौडेलको मोबाइल नम्बरमा वारदातको ठिक अगाडि फोन सम्पर्क भएको देखिएको, विभागले जनाएको छ । 

निज कुसाङ लामाले वारदातमा प्रयोग गरेको कन्टेनर (ट्रक) को पुनः खानतलासी गर्दा निजको खातामा नगद जम्मा गरेको भौचर, निजको विभिन्न बैंकको चेक बुक बरामद भएको समेतबाट र  अनुसन्धानका क्रममा बुझिएका व्यक्तिहरुले कागज गर्दा खुलाई दिएको विवरणबाट तथा  वारदात पश्चात निजले प्रयोग गर्ने मबोईल स्वीच अफ गरी फरार रहेको समेत देखिएबाट गरिएको अनुसन्धानले मालिकको पहिचान भएको जनाइएको छ ।