मकवानपुर । हेटौँडा सिमेन्ट उद्योग पुनः सञ्चालनमा आउने भएको छ । आर्थिक अभावका कारण थलिए पनि अघोषित लोडसेडिङका कारण देखाउँदै बन्द रहेको सिमेन्ट उद्योग सञ्चालनमा आउने भएको हो ।

गत असोजबाट बन्द रहेको उद्योगमा विद्युत् नियमित गरेर सञ्चालनमा ल्याउने तयारी भएको उद्योगका निमित्त महाप्रबन्धक नविन कर्णले जानकारी दिए । उद्योग चैतको अन्तिम साताबाट पुनः सुचारु हुने उनले बताए । उनका अनुसार चैतको २३ गतेबाट उद्योगको किलमा फायर गरेर उत्पादन थाल्ने तयारी भएको छ ।
‘एक दुई दिनमा उद्योग प्लान्टको किलमा फायर गर्ने तयारी भइरहेको छ । त्यसपछि उद्योग नियमित चल्छ,’ उनले भने, ‘कुनै भैपरी नआए अब उद्योग बन्द हुँदैन ।’

निमित्त महाप्रबन्धक कर्णले एक महिनालाई पुग्ने कच्चा पदार्थ मौज्दात रहेको बताए । उनले उद्योगले उत्पादन थालेपछि त्यही सिमेन्ट बेचेर समस्या टार्दै जाने दाबी पनि गरे । गत असोजमा उद्योग बन्द हुँदा मौज्दात रहेको करिब १ लाख ५० हजार बोरा सिमेन्ट बेचेर केही समय उद्योगका कर्मचारी र मजदुरलाई तलब भुक्तानी गरेको उद्योगमा पछिल्लो समय तलब खुवाउन नसकेपछि मजदुरहरू आन्दोलित भएका थिए । निमित्त महाप्रबन्धक कर्णले मजदुरसँग उद्योग सञ्चालनमा आएपछि तलब उपलब्ध गराउने सहमति भएको दाबी गरे ।

हेटौंडा सिमेन्ट उद्योग सञ्चालक समितिका अध्यक्ष नरेन्द्र भण्डारीले सरकारबाट खासै ठोस निष्कर्ष नआएको जानकारी दिँदै भारतबाट बिजुली आउन थालेसँगै अब उद्योग सञ्चालन गर्ने तयारी गरिएको बताए । उनले विद्युत आपूर्ति भएसँगै औधोगिक क्षेत्रमा रहेकोे लोडसेडिङ अन्त्य भएको र हेटौंडा सिमेन्ट उद्योग पनि चलाउन तयारी गरिएको जानकारी दिए । उनले यही २३ चैतबाट उद्योग सञ्चालन हुने दाबी गरे । यसपटक उद्योग सञ्चालन गरेपछि नियमित चल्ने उनले पनि दाबी गरे ।

छिमेकी मुलुक भारतबाट ४०६ मेगावाट बिजुली आएसँगै हेटौंडा सिमेन्ट उद्योग लगाएत औद्योगिक क्षेत्रहरूमा विद्युत् आपूर्ति नियमित भएको प्राधिकरण हेटौंडा वितरण केन्द्र जानकारी दिए ।

‘भारतबाट नेपालमा थप ४०६ मेगावट विद्युुत् आउन थालेको छ । केही समयअघि भारतबाट प्रत्येक दिन बिहान ६ देखि साँझ ५ बजेसम्म मात्रै विद्युत् आयात हुने गरेकोमा अब राति ११ बजेदेखि बिहान ४ बजेसम्म पनि विद्युत् उपलब्ध हुुने छ,’ प्रधिकरणको भनाइ छ । यसअघि दैनिक १२ घण्टा बिजुली आयात गर्दै आएको प्राधिकरणले गत शुक्रबारदेखि १६ घण्टासम्म आयात गर्न पाउने भएको हो ।