काठमाडौं । नेपाल प्रहरीको महानिरीक्षकमा दीपक थापा नियुक्ति हुनासाथ ब्यापारीहरुले चलखेल सुरु गरेका छन् । नेपाल टेलिकममा जागिर भए पनि कहिल्यै हाजिर नगरी तीनवटै सुरक्षा निकायमा ठेक्कापट्टा गर्दैआएका टोपेन्द्र बीसीले आईजीपी फेरिनासाथ ५ करोडको रुकस्याक ब्याग खरिदको टेण्डर गराउँदैछन् । आर्थिक बर्षको अन्तिममा प्रहरीका लागि २० हजार थान रुकस्याक ब्याग(पछाडि भिर्ने ब्याग) खरिदको टेण्डर सूचना यही साता निकाल्ने तयारीमा प्रहरीको आर्थिक तथा प्रबन्ध निर्देशनाय छ । 
ठेकेदार बीसीले सशस्त्र प्रहरी बलका डीआईजी दीपेन्द्र कुँवरमार्फत् कांग्रेस सभापति शेरबहादुर देउवाका स्वकीय सचिव भानु देउवा लगाएर उक्त टेण्डर निकाल्न लागेका हुन् । कुँवरका जेठान भानुले गृहमन्त्री रमेश लेखकमार्फत् आईजीपी थापालाई भनेपछि प्रबन्ध निर्देशनालयले टेण्डर निकाल्न लागेको हो । डीआईजी कुँवर र ठेकेदार बीसी मण्डिखाटार र महाराजगंजको हिमालयन जाभामा प्रायः दैनिकजसो कफी खाने बहानामा भेट्ने गर्दछन् । सशस्त्रमा पाँच बर्षदेखि आर्थिक प्रशासनमा बसी खरिदमा हालीमुहाली गर्दैआएका कुँवरले जेठानमार्फत् नेपाल प्रहरीको खरिदमा पनि ठेकेदार बीसीलाई लाभ पुर्याउन खोजेका छन् ।   
आर्थिक बर्ष २०८१–०८२ को अन्तिम त्रैमासिक सुरु हुन लागेको छ । असार २० गतेसम्म मात्र भुक्तानीको चेक जारी गर्ने ब्यवस्था गरिएको छ । असार २० गते खाता क्लोज गर्नैपर्छ । चैत अन्तिममा टेण्डर सूचना निकालेर असारसम्म सामान आपूर्ति गर्न संभव नभए पनि बीसीलाई ठेक्का दिनका लागि रुकस्याक ब्यागको टेण्डर निकाल्न लागिएको स्रोत बताउँछ । 
एउटा ब्यागको २ हजार २ सय रुपैयाँ मूल्य पर्ने २० हजार वटा ब्याग खरिदको नमूना टोपेन्द्र बीसी र उनका साझेदारको कम्पनी तेजसमलाई दिनेगरी सेटिङ भइसकेको छ । क्राइटेरियामै बीसी र उनका साझेदारको कम्पनीलाई मिल्नेगरी बनाएकाले टेण्डर सूचना निकाल्नुअघि नै उनीहरुले ठेक्का पाउने लगभग निश्चित भएको चर्चा प्रहरीमा छ । औपचारिकताका लागि मात्र टेण्डर गरिएको हो । 
टेलिकमा जागिर, प्रहरीदेखि सेनामा ठेक्का :
टेलिकमका सातौं तहका बरिष्ठ इन्जीनीयर हुन् टोपेन्द्र बीसी । तर उनी कहिल्यै टेलिकमको काम गर्दैनन् । उनलाई नेपाल प्रहरी, सशस्त्र प्रहरी र नेपाली सेनाका हाकिमहरुसँग ठेक्काको डिल गर्न भ्याई नभ्याई छ । उनलाई प्रहरी प्रधान कार्यालय नक्साल, सशस्त्र मुख्यालय हल्चोक र जंगीअड्डा भद्रकालीमा खरिदका हाकिमहरुकोमा ठेक्कामा डिल गर्दैगरेको भेटिन्छ । टेलिकममा जागिर भएकाले आफ्नो नाममा कम्पनी दर्ता नगरी उनले साला समुन्द्र खड्का र श्रीमती पार्वतीका नाममा दर्ता गरी ठेक्का लिने गरेका छन् । 
अख्तियार दुरुपयोग अनुसन्धान आयोगले २०८० चैत ४ गते नेपाल टेलिकमका प्राविधिक अधिकृत निर्मल सिटौलाबिरुद्ध आइतबार भ्रष्टाचार मुद्दा दायर गर्यो । सिटौला  टेलिकममा स्थायी जागिरे भए पनि ठेक्कापट्टा गरेको उजुरी परेपछि उनीबिरुद्ध मुद्दा दायर गरेको थियो । तर टेलिकममा जागिर खाएर नेपाली सेना, नेपाल प्रहरी र सशस्त्र प्रहरी बलमा बार्षिक करोडौंको ठेक्का लिने टोपेन्द्र बीसीलाई भने अख्तियारले देखेको छैन । बीसी कहिल्यै टेलिकमको काम गर्दैनन् भन्ने उजुरी अख्तियारमा परेको छ । तर उनको प्रहरीदेखि सेनाका उपल्लो तहका अधिकृत र नेपाली कांग्रेसका उपसभापति पूर्णबहादुर खड्कासँगको पहुँचका कारण मुद्दा दायर नभएको अनुमान पनि कतिपयले लगाउने गरेका छन् ।  एउटै कसुरमा सिटौलाबिरुद्ध मुद्दा दर्ता गरेको अख्तियारले बीसीलाई भने उन्मुक्ति दिइरहेको छ ।