May 30 2025 | २०८२, जेठ १६गते
काठमाडौँ ।राजस्व अनुसन्धान विभागले राजस्व अनुसन्धान कार्यालय बुटवलमार्फत् राजस्व चुहावटसम्बन्धी कसूरमा १ करोड बढीको मुद्दा दायर गरेको छ ।राजस्व अनुसन्धान विभागले उच्च अदालत तुलसीपुर बुटवल इजलासमा राजस्व चुहावट (अनुसन्धान तथा नियन्त्रण) ऐन २०५२को दफा २०(६) बमोजिम जेठ १४ गते मुद्दा दायर गरेको हो ।
राजस्व अनुसन्धान कार्यालय बुटवलका कार्यालय प्रमुख विवेक घिमिरे जनाए अनुसार जिल्ला रुपन्देही सिद्धार्थनगर नगरपालिा वडा न ८ लुम्बिनी गेटस्थित सुन्दर प्लाइउड सेन्टरका प्रोपराइटर आकाश अग्रहरीले सञ्चालन गरेको पसल र गोदाममा खानतलासी गरिएको थियो । खानतलासी तथा मालवस्तुको भौतिक निरीक्षण गर्दा प्रतिवादी अग्रहरीले राजस्व चुहावट गर्ने उद्देश्यले प्रस्तुत फर्मका नाममा मालवस्तु खरिद गरी मौज्दात किताबमा प्रविष्टि नगरेको , बीजक जारी नगरी मालवस्तु बिक्री गरेको , मौज्दात विवरण भन्दा अधिक मालवस्तु फेला परेको र खरिद तथा भन्सार पैठारी गरेको कुनै प्रमाण नभएको कार्यालय प्रमुख विवेक घिमिरेले नयाँ सडकसँगको कुराकानीमा बताए ।
उक्त फर्मले राजस्व चुहावट(अनुसन्धान तथा नियन्त्रण )ऐन २०५२को दफा ३ले निषेध गरेको कार्य गरी दफा४को खण्ड (क)(ख) (घ) र (झ)बमोजिम कसूर गरेको पुष्टि हुनआएको जनाउँदै विभागले सोही ऐनको दफा २(छ)१ ब्मोजिम भन्सार चोरी पैठारी तर्फ अधिक मौज्दातको बिगो ३ लाख २५ हजार ८ सय ७ रुपैयाँ, मूल्य अभिवृद्धि करतर्फको अधिक मौज्दात २ लाख ५२ हजार २ सय ७८ रुपैयाँ , मूल्य अभिवृद्धि करतर्फको न्यून मौज्दातको बगो १५ लाख ६९ हजार २ सय ३६ रुपैयाँ र आयकरतर्फको बिगो ३१ लख ८० हजार ३ सय २५ गरी ५३ लाख २७ हजार ६ सय ४६ रुपैयाँ बिगो कायम गरिएको छ ।
सोही ऐनको दफा २३(१) बमोजिम बिगोको शतप्रतिशतले हुने जरिवाना समेतगरी कुल बिगो १ करोड ६ लाख ५५ हजार २ सय ९२ रुपैयाँ कायम गरी मुद्दा दायर गरिएको विभागका प्रवक्ता तथा उपमहानिर्देशक कृष्णकुमारी श्रेष्ठले विज्ञप्ति जारी गरी जनाएकी छिन् ।
© 2025 All right reserved to Nayasadak.com | Site By : Sobij
