Sep 02 2025 | २०८२, भदौ १७गते
काठमाडौँ । नेपाल राष्ट्र बैंकका गभर्नर डा। विश्वनाथ पौडेलले कार्यकारी निर्देशकहरूको जिम्मेवारीमा महत्वपूर्ण हेरफेर गरेका छन्। यसपटकको निर्णयले राष्ट्र बैंकभित्रको नेतृत्व संरचनामा व्यापक फेरबदल भएको देखिन्छ।
बैंक सुपरिवेक्षण विभागको नेतृत्वमा रहेका रामु पौडेललाई अब मुद्रा व्यवस्थापन विभागको जिम्मेवारी दिइएको छ। उनी राष्ट्र बैंकको एक अत्यन्तै संवेदनशील र महत्वपूर्ण विभागको जिम्मेवारीबाट अन्य महत्त्वपूर्ण तर फरक प्रकृतिको भूमिकामा सरुवा भएका हुन्। उनीसँगको जिम्मेवारी साटासाट गर्दै, हालै मात्र कार्यकारी निर्देशकमा पदोन्नति पाएका दीर्घ बहादुर रावललाई बैंक सुपरिवेक्षण विभागको नेतृत्व दिइएको छ। रावल यसअघि पनि मुद्रा व्यवस्थापन विभागमै कार्यरत थिए, जसले उनलाई नयाँ जिम्मेवारीका लागि अनुभवी बनाउँछ।
सूचना प्रविधि विभागका कार्यकारी निर्देशक तुलसी प्रसाद घिमिरेको सेवानिवृत्तिसँगै रिक्त भएको पदमा रावलको बढुवा गरिएको हो। अब उक्त विभागको नेतृत्व कार्यकारी निर्देशक प्रदीपराज पौड्यालले सम्हाल्नेछन्। उनी यसअघि मुद्रा व्यवस्थापन विभागमा कार्यरत थिए।
योभन्दा अघि गभर्नर पौडेलले आफ्नो नियुक्तिसँगै केही महत्त्वपूर्ण जिम्मेवारीमा फेरबदल गरेका थिए। उनले डा। गुणाकर भट्टलाई आर्थिक अनुसन्धान विभागको नेतृत्वबाट गभर्नर कार्यालयमा ल्याएका थिए भने डा। रामशरण खरेललाई उक्त विभागको नयाँ प्रमुख नियुक्त गरेका थिए। त्यसैगरी, जनशक्ति व्यवस्थापन विभागमा कार्यरत तथा हालै कार्यकारी निर्देशकमा बढुवा भएका डा। डिल्लीराम पोखरेललाई पनि गभर्नर कार्यालयमा जिम्मेवारी दिइएको छ।
© 2025 All right reserved to Nayasadak.com | Site By : Sobij
