Jun 26 2025 | २०८२, असार १२गते
काठमाडौँ । चिप निर्माता कम्पनी एनभिडियाले फेरि एकपटक विश्वकै सबैभन्दा मूल्यवान कम्पनीको उपाधि फिर्ता लिएको छ। बुधबार यसको सेयर मूल्य ४ प्रतिशतभन्दा धेरैले बढ्दै १५४.१० डलरको ऐतिहासिक उच्च विन्दुमा पुगेपछि कम्पनीको बजार मूल्य ३.७६ ट्रिलियन डलरसम्म पुगेको हो। यो माइक्रोसफ्टको ३.६५ ट्रिलियन डलरभन्दा पनि माथि हो।
एनभिडियाको यो वृद्धि कम्पनीका उच्चस्तरीय एआई चिपहरूमा केन्द्रित मागका कारण भएको विश्लेषकहरू बताउँछन्। यस्तै विश्लेषकहरूले अब कम्पनीको मूल्य लक्ष्य १७५ डलरबाट बढाएर २५० डलरसम्म पुर्याएका छन्।
यस वृद्धिले एआई क्षेत्रतर्फको लगानी चासो पुनः बढाएको छ, जुन विगत केही वर्षदेखि लगातार चिप निर्माता कम्पनीहरूलाई फाइदामा ल्याउने मुख्य कारक बनेको छ।
हाल एनभिडियाको सेयर करिब ३० गुणा पीइ रेसियोमा कारोबार भइरहेको छ, जुन अघिल्ला पाँच वर्षको औसतभन्दा कम भए पनि, कम्पनीको आम्दानी अपेक्षाभन्दा छिटो बढिरहेको संकेत दिन्छ।
गत वर्षदेखि एनभिडिया, माइक्रोसफ्ट र एप्पलबीच सबैभन्दा मूल्यवान कम्पनीको प्रतिस्पर्धा चलिरहेको छ। जुन महिनाको सुरुमा माइक्रोसफ्टले अग्रता लिएको थियो भने अब फेरि एनभिडियाले पहिलो स्थान ओगटेको छ। यसैबीच एप्पलको बजार मूल्य पनि ३ ट्रिलियन डलरसम्म पुगेको छ।
© 2025 All right reserved to Nayasadak.com | Site By : Sobij
