काठमाडौँ।कर्णाली डेभलपमेन्ट बैंक लिमिटेडमा भएको अर्बौं रुपैयाँको वित्तीय अनियमितता र अपचलन प्रकरणमा नेपाल राष्ट्र बैंकका तत्कालीन कायम मुकायम निर्देशक भुवन बस्नेतको संलग्नता देखिएको छ।

वर्ष २०७५ को वैशाखमा बैंकमा स्थलगत अनुगमनका लागि खटिएको निरीक्षण टोलीको सुपरिवेक्षकका रूपमा कार्यरत बस्नेतमाथि बैंकभित्र भएका गम्भीर आर्थिक अनियमितता लुकाउन सहयोग गरेको र व्यक्तिगत लाभ लिएको आरोप लागेको हो।

हकप्रद शेयरमा अपचलन, कल इन एडभान्स खाता दुरुपयोग

राष्ट्र बैंकको निर्देशनअनुसार पूँजी वृद्धि गर्न कर्णाली डेभलपमेन्ट बैंकले 'कल इन एडभान्स' खातामा नगद रकम जम्मा गर्न सार्वजनिक सूचना जारी गरेको थियो। तर, सो खातामा जम्मा भएको रकमको स्रोत पुष्टि हुन सकेन, कारोबार गर्ने व्यक्तिहरूको नाम र दस्तखतसमेत किर्ते गरिएको पाइएको छ। निरीक्षण प्रतिवेदनमा यी गम्भीर विषयहरू लुकाइएको उल्लेख गरिएको छ।

अनुसन्धानमा करिब ४ करोड रुपैयाँ बराबरको गैरकानुनी हकप्रद शेयर प्राप्त गरी अपचलन गरिएको र यसमा सुपरिवेक्षक बस्नेतको प्रत्यक्ष भूमिका रहेको देखिएको छ।

अनियमित खातामा रकम जम्मा, आपराधिक लाभ प्रमाणित

भुवन बस्नेतको माछापुच्छ्रे बैंक खातामा १० लाख ८४ हजार २५० रुपैयाँ जम्मा भएको भेटिएको छ। जसमध्ये ८५ हजार कर्णाली डेभलपमेन्ट बैंकबाट सिधै खातामा भुक्तानी गरिएको हो। बाँकी ९ लाख ९९ हजार २५० रुपैयाँको स्रोत स्पष्ट नभएको पाइएको छ।

बस्नेतले सो रकम गाडी बिक्रीबाट प्राप्त भएको दाबी गरे पनि सम्बन्धित गाडी कर्णाली बैंकको सम्पत्तिको रूपमा अभिलेखमा नरहेको पुष्टि भएको छ।

आईफोन र नगदसहित १० लाख ८९ हजार २५० को आपराधिक लाभ

अनुसन्धानमा अर्का प्रतिवादीहरूले बस्नेतलाई आर्थिक लाभ दिएकै पुष्टि गरेका छन्। प्रतिवादी बेद प्रकाश सिंह ठकुरी र राजेन्द्र वीर रायले बस्नेतलाई आईफोन ७ दिएको र रकम हस्तान्तरण गरिएको बयान दिएका छन्।

यो लाभको कुल रकम १० लाख ८९ हजार २५० रुपैयाँ बराबरको रहेको छ। अनुसन्धानले भुवन बस्नेतले बैंकिङ कसुर तथा सजाय ऐन २०६४ को दफा १४ अन्तर्गतको कसुर गरेको ठहर गर्दै उनलाई सोही ऐनको दफा १५ अनुसार कारबाही गर्न माग गरेको छ।

नेपाल राष्ट्र बैंक जस्तो संवेदनशील नियामक संस्थाका वरिष्ठ अधिकृत बस्नेतले सार्वजनिक वित्तीय प्रणालीमा गरेको अपचलनले नियमन संयन्त्रप्रतिको विश्वासमा आघात पुर्‍याएको छ। अब कानुनी कारबाहीमार्फत दोषीमाथि उपयुक्त सजायको माग तीव्र बन्दै गएको छ।