Nov 11 2025 | २०८२, कात्तिक २५गते
काठमाडौँ । प्रधानमन्त्री सुशीला कार्कीले नेपाल वायु सेवा निगममा खुला प्रतिस्पर्धाबाट महाप्रबन्धक नियुक्त गर्ने प्रक्रियामा भएको प्रगति ढिलाइबारे चिन्ता व्यक्त गरेकी छिन् ।
संस्कृति, पर्यटन तथा नागरिक उड्डयनमन्त्रीका हैसियतले उनले मन्त्रालयका सचिव हरि मैनालीलाई आफ्नो कार्यकक्षमा बोलाएर केही प्रगति नभएकोमा चिन्ता व्यक्त गरेकी हुन् ।
निगममा महाप्रबन्धक खुला प्रतिस्पर्धाबाट नियुक्त गर्न प्रधानमन्त्री कार्कीले सचिव मैनालीकै संयोजकत्वमा गत कात्तिक १४ गते छनोट समिति गठन गरेकी थिइन् ।
उक्त समितिमा क्याप्टेन केबी लिम्बू विज्ञ सदस्य र मन्त्रालयकै योजना तथा प्रशासन महाशाखा प्रमुख रहने सहसचिव सदस्यसचिव छन् ।तर नियुक्ति प्रक्रिया नबढेपछि सचिवलाई प्रधानमन्त्री कार्कीले बोलाएर जानकारी लिएकी छिन् ।
यसबीचमा कार्यविधिको काम गरेको र केही समय बाहिर पनि जानुपरेको बताउँदै सचिव मैनालीले आजै समितिको पहिलो बैठक बस्ने जानकारी गराए ।
प्रधानमन्त्री कार्कीले ढिलो नगरी खुला प्रतिस्पर्धाका लागि दर्खास्त आह्वानको सूचना प्रकाशित गर्न निर्देशन दिएकी छन् ।
© 2025 All right reserved to Nayasadak.com | Site By : Sobij
