काठमाडौं । विराटनगर भन्सार कार्यालयका तत्कालीन प्रमुख भन्सार अधिकृत र भन्सार अधिकृत विरुद्ध अख्तिायर दुरुपयोग अनुसन्धान आयोगले मुद्दा दायर गरेको छ ।
विराटनगर भन्सार कार्यालयका तत्कालीन प्रमुख भन्सार अधिकृत तारा प्रसाद सापकोटा र भन्सार अधिकृत नवकुल शर्माले भ्रष्टाचार गरेको ठहर गर्दै अख्तियारले आज मंगलबार मुद्दा दायर गरेको हो ।
विराटनगर भन्सार कार्यालयमा कार्यरत रहँदा सापकोटा र शर्माले मिलेमतो गरी चीनबाट आयात गरिएको सामानको प्रज्ञापन पत्र नम्बर एम ७२६लाई दर्ता गरेपछि त्यसलाई सिस्टमबाटै हटाएर अनियमितता गरेको अख्तियारले ठहर गरेको छ ।
अख्तियार दुरुपयोग अनुसन्धान आयोगले मंगलबार जारी गरेको विज्ञप्तिमा सापकोटा र शर्माले आयातकर्तासँग मिली राजस्व चुहावट गरेको तथा अनुचित लाभ लिएको निष्कर्ष निकाल्दै सापकोटा र शर्मा विरुद्ध ८४ लाख ५५ हजार ६ सय ५ रुपैयाँ बिगो र सजाय मागदाबी गरी विशेष अदालत काठमाडौंमा मुद्दा दायर गरेको छ ।
यसैगरी अख्तियारले देव इन्टरनेशनलका सञ्चालक शेरबहादुर बस्नेत र भन्सार एजेन्ट शरणकुमार खरेलविरुद्ध पनि भ्रष्टाचार मुद्दा दायर गरेको छ ।
यस्तो छ अख्तियारद्वारा जारी विज्ञप्तिको पूर्णपाठ (हेर्न यहाँ क्लिक गर्नुहोस)
