काठमाडौं । ऊर्जा जलस्रोत तथा सिंचाईमन्त्री शक्तिबहादुर बस्नेतले सरकारले बनाउने नीति तथा कार्यक्रममा हरित(ग्रिन) अर्थतन्त्रलाई प्राथमिकता दिनुपर्ने बताएका छन् । बुधबार काठमाडौंमा आयोजित हाइड्रोजन डायलग कार्यक्रममा ऊर्जा मन्त्री बस्नेतले यस्तो बताएका हुन् ।
नेपालमा ग्रिन अर्थतन्त्र र ग्रिन आर्थिक विकासको चर्चा गर्न ढिला भएको भन्दै ऊर्जा मन्त्री बस्नेतले अब ग्रिन अर्थतन्त्रलाई नीतिगत रुपमा अगाडि बढाउनुको विकल्प नभएको बताए ।
स्रोत उलब्धताको दृष्टिकोणबाट हेर्दा नेपाल सरकारले स्रोतलाई आर्थिक विकासको अभियानमा व्यवस्थित ढङ्गले सदुपयोग गरी आर्थिक विकास समृद्धिको सपना पूरा गर्न नसकेको भन्दै ऊर्जा मन्त्री बस्नेतले विश्व ग्रिन अर्थतन्त्रमा गइसकेको बताए ।
