काठमाडौं । धादिङको थाक्रे गाउँपालिका–५, गैरीखर्कमा भएको आगलागीमा परी एक दम्पतीको मृत्यु भएको छ ।बुधबार राति आगोमा जलेर घरभित्रै रहेका ७० वर्षीय तेजबहादुर लामा र उनकी श्रीमती ठूली तामाङको घटनास्थलमै मृत्यु भएको हो ।
प्रहरीले आगलागीको खबर गएराति साढे ११ बजे पाएको थियो । नजिकको हाप्सेचौर अस्थायी प्रहरी पोष्टबाट प्रहरी टोली पुग्दा घर पूरै जलिरहेको थियो ।
जिल्ला प्रहरी कार्यालय धादिङका प्रवक्ता मकेन्द्र मिश्रले जनाए अनुसार दमकल जाने स्थिति पनि थिएन । राति साढे १२ बजे आगो निभेपछि घरभित्र हेर्दा दुई जनाको मृत्यु भएको देखियो ।
आगोमा जलेको धनमाल क्षतिको विवरण संकलनका लागि इन्सपेक्टरको कमाण्डमा प्रहरी टोली खटिएको र प्रतिवेदन बन्न बाँकी रहेको प्रहरीले जनाएको छ ।
