काठमाडौं । नेपाल वायुसेवा निगमको न्यारोबडी जहाज मर्मतमा भएको ढिलाइबारे छानबिन गर्न समिति गठन गरिएको छ ।नेपाल एयरलाइन्स व्यवस्थापनले निगमको ९एन–एकेएक्स जहाजको इन्जिन मर्मतमा करिब ५ महिनाभन्दा बढी समय लागेको विषयमा छानबिन समिति गठन गरेको हो ।
निगमका प्रवक्ता रमेश पौडेलले जानकारी सार्वजनिक गरे अनुसार निगम सञ्चालक समितिको बैठकले सञ्चालक समिति सदस्य सुधिर शमशेर राईको संयोजकत्वमा पाँच सदस्यीय छानबिन समिति गठन गरेको छ ।
यो समितिलाई जहाजको इन्जिन इजरायल एरोस्पेस इन्ड्रस्ट्रिजमा मर्मतका लागि पठाएकोमा समयमा नआएको र भाडाको इन्जिन समयमा नदिएको सम्बन्धमा छानबिन र अध्ययन गरी १५ दिनभित्र सिफारिससहितको प्रतिवेदन बुझाउने गरी कार्य आदेश दिइएको छ ।
निगमका प्रवक्ता पौडेलले जानकारी सार्वजनिक गरे अनुसार सम्झौताको सर्तअनुसार समयमा इन्जिन दिन नसकेको सम्बन्धमा निगमको सीएएम डिपार्टमेन्टबाट क्षतिपूर्ति दाबी गर्ने प्रक्रिया समेत अगाडि बढेको छ ।
