काठमाडौं । विकसित राजनीति परिस्थितिमा सरकारमा बसी निरन्तरता दिन गाह्रो भएको भन्दै उपप्रधान तथा स्वास्थ्य मन्त्री उपेन्द्र यादवले राजीनामा दिएका छन् । जनता समाजवादी पार्टी, नेपालका अध्यक्ष समेत रहेका यादवले सोमबार प्रधानमन्त्रीलाई सम्बोधन गरी राजीनामा पत्र पठाएका हुन् ।
उनले राजीनामा पत्र मार्फत् भनेका छन् ‘सम्माननीय प्रधानमन्त्रीज्यूको नेतृत्वमा गठन गरिएको सरकारमा विगत करिब दुई महिनादेखि म उपप्रधानमन्त्रीको रूपमा जिम्मेवारी सम्हाल्दै आएकोमा वर्तमान विकसित राजनीतिक परिस्थितिमा सरकारमै रहेर सहकार्यलाई निरन्तरता दिन नसकिने भएको हुँदा उक्त जिम्मेवारीबाट राजीनामा दिन चाहन्छु’ ।
आजै बस्न लागेको पार्टीको कार्यकारिणी समितिको बैठक अगाडि नै उनले राजीनामा बुझाएका हुन् । वन तथा वातावरण राज्यमन्त्री दीपक कार्कीले पनि राजीनामा दिएका छन् ।
अध्यक्ष यादव स्वास्थ्यमन्त्रीको हैसियतमा अमेरिकामा आयोजित कार्यक्रममा भाग लिन गएका बेला अघिल्लो साता जसपा नेपाल विभाजन भएको थियो । सो पार्टीका वरिष्ठ नेता अशोक राई नेतृत्वमा जनता समाजवादी पार्टी गठन गरिएको थियो । राई नेतृत्वको जनता समाजवादी पार्टी अहिले प्रचण्ड नेतृत्वको सरकारबाट हट्ने निर्णय गरेको छैन् । यादव फर्किएर प्रधानमन्त्री प्रचण्डसँग भेटेर तत्काल सरकारमा बसिरहने जनाएको एक साता नबित्दै सरकारबाट राजीनामा दिएका छन् ।
