ललितपुर /काठमाडौं । अन्ततः ललितपुर जिल्लाको गोदावरी नगरपालिकाका तत्कालीन प्रमुख प्रशासकीय अधिकृत प्रवीण कोइरालासहितलाई भ्रष्टाचार मुद्दा लागेको छ ।
नयाँ सडक डटकमले २०७८ माघ ७ गते नै गोदावरी नगरपालिकाका प्रमुख प्रशासकीय अधिकृत प्रवीण कोइरालासमेतको मिलेमतोमा प्राकृतिक स्रोतसाधनको अवैध र अस्वाभाविक दोहन गरेर अनियमितता गरेको समाचार बाहिर ल्याएको थियो ।
अख्तियार दुरुपयोग अनुसन्धान आयोगले खानी तथा खनिजजन्य वस्तुको बिक्रीबाट प्राप्त हुने राजस्व हिनामिना गरेको अभियोगमा तत्कालीन प्रमुख प्रशासकीय अधिकृत प्रवीण कोइरालासमेत १४ जना विरुद्ध १ अर्ब भन्दा बढी बिगो कायम गरेर भ्रष्टाचार मुद्दा दायर गरेको हो ।
गोदावरीका प्रमुख गजेन्द्र महर्जन, उपप्रमुख मुना अधिकारी तथा तत्कालीन प्रमुख प्रशासकीय अधिकृतहरू प्रवीण कोइराला, वीरेन्द्रदेव भारती,कृष्णप्रसाद जैसी र विश्वराज मरासैनीसहित १४ जनालाई प्रतिवादी बनाएर विशेष अदालतमा अख्तियारले सोमबार मुद्दा दायर ग¥यो ।
त्यसबखत नै नयाँ सडक डटकमले गोदावरी नगरपालिका भित्र भएको अनियमितता , प्राकृतिक स्रोतसाधनको दोहन, प्रभावमा परी खेती योग्य जमिनलाई प्लटिङलगायतका अनियमितताका विषयमा समाचार लेखेको थियो ।
नगरपालिका भित्रको अनियमितता नयाँ सडक दैनिकले प्रकाशन गरेपछि त्यसबखतका प्रमुख प्रशासकीय अधिकृत प्रवीण कोइरालाले प्रेस काउन्सिललगायतमा नयाँ सडक विरुद्ध मुद्दा समेत हालेका थिए ।
तर अन्ततः अख्तियारले प्रमुख प्रशासकीय अधिकृत कोइरालासहित १४ जना विरुद्ध अर्ब बढीको बिगो कायम गरी मुद्दा दायर गरेको छ ।
त्यसबखत नयाँसडक डटकमले प्रकाशन गरेका समाचारहरू पढ्न यहाँ क्लिक गर्नुहोस् :
