काठमाडौं । सरकारले चामल दाल गहुँ मैदा जस्ता खाद्यवस्तुमा अग्रिम आयकर वृद्धि गरेपछि बजारमा खाद्यवस्तुको मूल्य वृद्धि भएको छ ।सरकारले बजेट मार्फत यी खाद्यवस्तुहरूमा १०प्रतिशतसम्मको अग्रिम आयकर वृद्धि गरेको घोषणा गरेयता व्यवसायीहरूले मूल्य वृद्धि गरेका हुन् ।
विदेशबाट चालु आर्थिक वर्ष २०८०/८१को १० महिनामा सबै खाले चामलको आयात साढे ७ करोड किलो बढी आयात गरिएको छ ।भन्सार विभाग सार्वजनिक गरेको प्रतिवेदन अनुसार बासमतीलगायत सबै किसिमका चामलको आयात साउनदेखि बैशाख महिनासम्म ७ करोड ६३ लाख २७ हजार ९६७ किलो आयात भएको छ ।
भन्सार विभागको एकीकृत महसुल दरबन्दी अनुसार चामलमा प्रतिकिलो १२ रुपैया ५० पैसा भन्सार लिने गरेको छ ।यसरी लाग्ने एकीकृत भन्सार महसुल केही सन्दर्भमा छुटको व्यवस्था पनि गरिएको छ ।
भारत र चीनको तिब्बतबाट स्थलमार्ग हुँदै भन्सार महसुल पूर्णरूपमा छुट हुने र समुद्रपारबाट पैठारी हुँदा कृषि सुधार शुल्क नलाग्ने उल्लेख गरिएको छ ।
सरकारले खाद्यवस्तुमा अग्रिम आयकर २.५ प्रतिशतदेखि १० प्रतिशतसम्म वृद्धि गरेकोले उद्योगी व्यवसायीहरूले कृषिमा आधारित खाद्यवस्तुको उत्पादन बन्द हुने चेतावनी दिएका छन् ।
भन्सार विभागको प्रतिवेदन अनुसार चालु आर्थिक वर्षको १० महिनामा चीन,भारत, इन्डोनेसिया,इटली, जापान,मलेसिया, थाइल्यान्ड , भिएतनाम,अमेरिका र नामिबियाबाट चामल आयात भएको छ ।
