बाँके । राजस्व अनुसन्धान कार्यालय कोहलपुरले व्यवसायीहरूलाई दुःख दिएको छ । राजस्व अनुसन्धान कार्यालय कोहलपुरले उद्योगी व्यवसायीहरूलाई फोन गर्दै कार्यालयमा बोलाउने , फिल्डमै गएर बिना पत्र÷ पुर्जी व्यवसायिक फर्महरूका कागजपत्र नियन्त्रणमा लिने गरेर उद्योगी व्यवसायीहरूलाई दुःख दिएको हो ।
राजस्व अनुसन्धान कार्यालय कोहलपुरले विगत एक महिना यतादेखि उद्योगी व्यवसायीहरूलाई यसरी नै जबरजस्ती कार्यालयमा बोलाउने र विभिन्न बहानामा अतिरिक्त रकम असुल्ने गरेको एक व्यवसायीले नाम र कम्पनीको नाम नबताउने शर्तमा नया सडकलाई बताए ।
उनले राजस्व अनुसन्धान कार्यालय कोहलपुरले पछिल्लो समय बिना कारण व्यवसायीहरूलाई अनावश्यक दुःख दिने गरेको र व्यवसायीलाई अनावश्यक झन्झट पैदा गर्ने गरेको बताए । कोहलपुर कार्यालयले निश्चित मान्छे परिचालन गरेर व्यवसायीहरूलाई दुख दिएको नेपालगञ्जका एक व्यवसायीले बताए ।
राजस्व अनुसन्धान कार्यालयहरूले कार्यालय अन्तर्गतका उद्योगी व्यवसायी वा अन्य कुनै पनि सेक्टरमा राजस्व चुहावट ,विदेशी मुद्राको कारोबार /अपचलन तथा राजस्व चुहावटसम्बन्धी अन्य कुनै गतिविधि भएको सूचना वा जानकारी भए र उनीहरूमाथि कारबाही गर्नुपर्ने भए अनिवार्यरूपमा विभागका महानिर्देशकसँग अनुमति लिनुपर्ने हुन्छ ।
तर राजस्व अनुसन्धान कार्यालय कोहलपुरले झण्डै दुई दर्जन भन्दा बढी व्यवसायीहरूलाई बिना अनुमति फोन गर्दै कार्यालयमा बोलाउने, बिना अनुमति उद्योगी व्यवसायीका कागजपत्र नियन्त्रणमा लिने गरेको व्यवसायीहरूको गुनासो छ ।
यससम्बन्धमा राजस्व अनुसन्धान कार्यालय कोहलपुरका प्रमुख तीर्थ खनालले मैले पनि विभिन्न व्यक्तिहरूबाट यस्तो कुरा सुनेको बताउँदै राजस्व अनुसन्धान कार्यालय कोहलपुका केही कर्मचारीहरूबाट यस्तो भएको हुनसक्ने बताए । उनले अविलम्ब खास कुरा के हो पता लगाउने पनि नया सडकसँग बताए ।
