काठमाडौं । राजस्व अनुसन्धान कार्यालय पथलैयामा कार्यरत अफिसर प्रमोदकुमार चौधरी बेलगाम भएका छन् । तीन पटक सरुवा हुँदा पनि दुई पटक सरुवा क्यान्सिल गराई पथलैयामा बस्न सफल चौधरीको केही दिन अगाडि तेस्रो पटक सरुवा भएको हो ।
तेस्रो पटक सरुवा भएको भनिएपनि चौधरीले अहिले पनि पथलैयामा बसेर नियमित काम कारबाही गरिरहेका छन् । सरुवा भएका चौधरीको हस्ताक्षरमा तयार पारिएका विभिन्न कागजातहरू राजस्व अनुसन्धान विभागमा आएपछि विभागले त्यस्ता कागजपत्रहरूमाथि प्रश्न उठाएको छ ।
विगत लामो समयदेखि राजस्व अनुसन्धान कार्यालय पथलैयामा बसेर बेलगाम काम गर्दै आएका चौधरीले उद्योगी व्यवसायीहरूलाई अनावश्यक दुःख दिने र असुली गर्ने गरेको समाचार यस अघि नै नयाँ सडकले लेखिसकेको छ ।तीसवटा भन्दा बढी फाइलहरू चौधरीको अन्डरमा अहिले पनि छन् । ती फाइलहरूमा केही पुराना छन् भने केही नयाँ छन् । केही फाइलहरू चौधरीको व्यक्तिगत घर्रामा छन् । पुराना फाइलहरूको अनुसन्धान र तहकिकात गर्नुपर्नेमा चौधरीले त्यसो नगरी केबल असुली मात्र गरेर फाइल थन्काएर राखेका छन् ।
वीरगञ्जको एक साइकल पसलमा छापा हान्दा फाइल कार्यालयमा दर्तै नगरिकन बीचमै सल्टाएका छन् । यस्तै जनकपुरको एक कपडा पसलमा केही समय अगाडि छापा हानिएको थियो । उक्त फाइल दर्ता गरिएको भएपनि उक्त फाइल दर्ता भएको नम्बरमा टिपेक्स लगाएर अर्को फाइल दर्ता गरिएको छ । उक्त दुईओटा फर्महरूबाट मोटो रकम असुलेको कार्यालय र व्यापारीहरूबीच नै चर्चा नचलेको होइन् । यस्तै चौधरीलगायतको टोलीले वीरगञ्जस्थित एक टायल्स फर्ममा र एक कुखुरा फर्ममा छापा मारेको थियो । उक्त फाइलहरू पनि दर्तै नगरी मोटो रकम नजराना लिएको कार्यालय भित्रै चर्चा छ ।
भन्सार र राजस्वमा खासै ज्ञान नभएका चौधरीले प्याजलगायतका गाडीहरूमा भीसीटीएस मात्र लगाएर छोड्ने गरेको बताइन्छ । अन्दाजीरुपमा प्रत्येक गाडीको एकमुष्ट रकम लिने र भीसीटीएसको मात्र पैसा रकम बुझाएर चौधरीले अरु आफूखुसी गर्ने गरेको बताइएको छ ।
चौधरीले हेरेका ८० प्रतिशत भन्दा बढी गाडीमा २५ हजार रुपैया मात्र तिराएर छाडेका छन् । चौधरीले हेरेका मालवाहक गाडीहरूमा भीसीटीएस मात्र लगाएको बिगो र मागदाबी नगण्य रहेको कार्यालयको रेकर्डबाट हेर्न सकिन्छ । यससम्बन्धमा चौधरीसँग सम्पर्क गर्न खोज्दा सम्पर्क हुन सकेन् ।
