काठमाडौं। सर्वोच्च अदालतको संयुक्त इजलासले नेपाल धितोपत्र बोर्ड अध्यक्ष प्रक्रिया यथास्थितिमा राख्न नयाँ छनौट प्रक्रिया अगाडि बढाउन गरिएको अन्तरिम आदेशलाई निरन्तरता दिएको छ ।नेपाल धितोपत्र बोर्डको अध्यक्ष नियुक्ति प्रक्रिया खारेजीपछि सन्तोष नारायण श्रेष्ठले हालेको मुद्दामा सर्वोच्च अदालतले अल्पकालिन अन्तरिम आदेशलाई नै निरन्तरता दिएको हो ।
गत मंगलबार न्यायाधीश अव्दुल अजीज मुसलमानको इजलासले गरेको निर्णयलाई शुक्रबार न्यायाधीशहरू सपना मल्ल प्रधान र बालकृष्ण ढकालको संयुक्त इजलासले छनौट प्रक्रिया यथास्थितिमा राख्न आदेशलाई निरन्तरता दियो । अर्को पेशी साउन दोस्रो सातालाई तोकिएको छ।
धितोपत्र बोर्डको अध्यक्षका लागि १९ जनाले आवेदन दिएका थिए। त्यसमध्ये ५ जना सर्टलिस्टमा परेका थिए। ५ मध्ये तीन जना अन्तर्वार्तामा सामेल भएनन् । कानुनी व्यवस्था अनुसार, तीन जनाको नाम नियुक्तिका लागि सिफारिस गर्नुपर्ने थियो । तर दुई जना मात्र अन्तर्वार्तामा मात्र सामेल भएको विषय छनौट समितिमा विवादित बन्न पुग्यो ।
यसबारे अर्थ मन्त्रालयले महान्यायाधिवक्ता कार्यालयसँग राय पनि मागेको थियो । महान्यायाधिवक्ताको कार्यालयले तीन जना वा सो भन्दा बढी सिफारिस गरी पठाउन सकिने खालको जवाफ पठाएको थियो । तर छनौट समितिमा अर्थ सचिव मधु मरासिनीले विवाद हुने भएकोले सिफारिस गर्न नमानेपछि मन्त्रालयले छनौट प्रक्रिया खारेज गरेको थियो ।
