काठमाडौं । गत आर्थिक वर्ष २०८०/०८१ मा ७० अर्ब बढीको विदेशी लगानी प्रतिबद्धता आएको छ । अघिल्लो वर्ष साउनदेखि गत असारसम्मको गत आर्थिक वर्षको अवधिमा विभिन्न मुलुकका लगानीकर्ताबाट ७० अर्ब २० करोड बढी रुपैयाँ बराबरको विदेशी लगानी प्रतिबद्धता प्राप्त भएको हो ।
५सय ४६ वटा लगानीमार्फत ७० अर्ब रुपैयाँभन्दा बढीको प्रतिबद्धता आएको उद्योग विभागले जानकारी सार्वजनिक गरेको छ । गत आर्थिक वर्षमा स्वचालित प्रणाली र परम्परागत प्रणालीबाट गरी सो रकम बराबरको लगानीको प्रतिबद्धता प्राप्त भएको जनाइएको छ ।सरकारले वैशाख १६ र १७ गते दुई दिने लगानी सम्मेलनले गरी लगानीकर्तालाई लगानी गर्न आह्वान समेत गरेको थियो । त्यस क्रममा स्वचालित प्रणालीको सुरुवात गरिएको थियो । स्वचालित बाटो (अटोमेटिक रुट)मार्फत ५० करोड रुपैयाँसम्मका विदेशी लगानीका उद्योग स्थापना गर्न सकिन्छ ।
यो माध्यमबाट ऊर्जामूलक उद्योग, कृषि तथा वन पैदावारमा आधारित उद्योग, पूर्वाधार उद्योग, पर्यटन उद्योग, सूचना प्रविधिमा आधारित उद्योग, सेवामूलक उद्योग, उत्पादनमूलक उद्योगसमेत दर्ता गर्न पाइने प्रावधान छ ।वैशाखको तेस्रो सातादेखि सञ्चालनमा आएको यो स्वचालित बाटोको प्रणालीबाट ८ अर्ब ११ करोड ६२ लाख रुपैयाँ विदेशी लगानीको प्रतिबद्धता आएको उद्योग विभागले जनाएको छ ।
उपस्थित बनेर दर्ता गर्ने विधि परम्परागत प्रणालीमार्फत ६१ अर्ब ९० करोड ४५ लाख रुपैयाँको प्रतिबद्धता आएको जनाइएको छ । स्वचालित प्रणाली र परम्परागत प्रणालीमार्फत गरी कुल ७० अर्ब २० करोडको लगानी प्रतिबद्धता आएको हो ।सो अवधिमा ५४६ वटा उद्योग स्थापनाको प्रतिबद्धता आएको छ । नेपालमा वैदेशिक लगानी सुरु भएयता हालसम्म ६ हजार २६७ वटा प्रतिबद्धतामार्फत ५ खर्ब ११ अर्ब ८९ करोड रुपैयाँभन्दा बढी लगानीको प्रतिबद्धता आएको छ ।
विदेशी लगानीकर्ताले गरेको लगानी प्रतिबद्धता बमोजिम लगानी भित्रिए २२ हजार ९४ जनाले रोजगारी पाउने अपेक्षा गरिएको छ ।
तर नेपाल राष्ट्र बैंकको तथ्यांक अनुसार प्रतिबद्धता बमोजिम लगानी नआउने गरेको छ ।गत आर्थिक वर्ष २०८०/८१ मा सबैभन्दा धेरै लगानी असार महिनामा भित्रिएको छ । तथ्यांक अनुसार असार महिनामा मात्रै १९ अर्ब ९५ करोड रुपैयाँ विदेशी लगानीको प्रतिबद्धता आयो ।