काठमाडौँ । काठमाडौं अपराध अनुसन्धान कार्यालयले अवैध चाँदीसहित पाँच जनालाई पक्राउ गरेको छ ।कार्यालयको अनुसन्धानबाट  भारतबाट नेपालमा चाँदी तस्करी हुने गरेको खुलेको हो । तराईका जिल्ला हुँदै संघीय राजधानी काठमाडौंसम्म ल्याएर चाँदीको अवैध कारोबार हुने गरेको खुलेको जनाइएको छ ।

पक्राउ पर्नेहरूमा बाराको कलैया नगरपालिका–८ खपरटाटा घर भएका २८ वर्षीय गणेश साह, कलैया–८ कै ३४ वर्षीय प्रेमकुमार कुशवाहा, बाराकै जितपुर सिमरा उपमहानगरपालिका–१६ घर भई काठमाडौं महानगरपालिका–३२ नरेफाँट बस्ने २२ वर्षीया विपना सार्की, पर्साको वीरगञ्ज महानगरपालिका–१६ नगुवा गाउँ बस्ने ३२ वर्षीय दिनानाथ साह सुनार र बाराकै कलैया नगरपालिका–८ घर भई काठमाडौं नरेफाँट बस्ने ३४ वर्षीय सन्तोषकुमार साह रहेका छन् ।

अपराध अनुसन्धान कार्यालयको गुप्त सूचनाका आधारमा चाँदीको तस्करीबारे थाहा पाएर उनीहरूलाई पक्राउ गर्न सफल भएको जनाइएको छ ।अपराध अनुसन्धान कार्यालयका प्रमुख तथा एसएसपी रमेश बस्नेतले जनाए अनुसार  थप अनुसन्धान तथा कारबाहीका लागि राजस्व अनुसन्धान विभागको कार्यालय हरिहर भवन ललितपुर बुझाइएको छ ।

नेपालमा भन्दा भारतमा चाँदी केही सस्तो छ । त्यसमाथि भन्सार छलेर पास गराएपछि झन् ठूलो फाइदा हुने भएर तस्करी गरिएको सम्बद्ध स्रोतले जनाएको  छ ।मोटरबाइकको ट्यांकीमा फल्सबटम बनाएर तस्करी विधि अपनाइएको पाइएको छ ।तेल ट्यांकीको केही भाग काटेर प्वाल पार्ने र चाँदीलाई प्लास्टिकमा पोको पारेर भारतबाट रक्सौल हुँदै काठमाडौंको बजारसम्म ल्याउने गरेको सम्बद्ध प्रहरी अधिकारीको भनाइ छ ।

काठमाडौं ल्याएपछि नरेफाँटमा भण्डारण गरी त्यहीँबाट बेचबिखन हुने गरेको अनुसन्धानको क्रममा खुलेको छ ।
पक्राउ परेका पाँच नेपालीमध्ये यसन्तोषकुमार साह नाइके रहेको बुझिन्छ । करिब ४ वर्षअघिसम्म सन्तोषको बाराको कलैयास्थित सिनेमा रोडमा शुभलक्ष्मी ज्वेलर्स नामको गरगहनाको पसल थियो । ब्याज तिर्न नसकेका कारण समस्या भएपछि पसल बिक्री गरिएको साहको भनाइ छ । पसल बिक्री गरेर तीन वर्ष पहिले वैदेशिक रोजगारीमा आफू दुबई गएको सन्तोषले प्रहरीलाई  बताएका छन् । दुबईबाट  ११ महिनामा फर्केका उनले त्यसपछि चितवनको नारायणगढमा होटल सञ्चालन गरेका थिए । उक्त होटल बिक्री गरेपछि भने उनी चाँदी तस्करीमा लागेको बुझिन्छ । 

होटल बेचेर करिब ८/९ महिना अघि काठमाडौं छिरेका सन्तोषले हाल पक्राउ परेका प्रेमकुमार कुशवाह र गणेश साहलाई भरियाको रूपमा प्रयोग गरेर चाँदीको तस्करी गर्ने गरेको प्रहरीले जनाएको छ ।एकपटकमा १५ देखि २० किलो चाँदी ल्याउने गरिएको र महिनामा कम्तीमा तीन पटक ल्याउने गरिएको उनीहरूको भनाइबाट थाहा भएको प्रहरीले जनाएको छ । भरियालाई १० हजार ज्याला दिने गरिएको थियो । २० किलो चाँदी काठमाडौं ल्याए बापत १० हजार रुपैयाँ ज्याला दिने गरिएको थियो । ना ४१ प ३३४६ नम्बरको मोटरसाइकलमा फल्स बटम बनाएर चाँदी तस्करी गर्ने गरेको प्रहरीको भनाइ छ । 

पक्राउ परेकी युवती सार्की भने सन्तोषको प्रेमिका रहेको प्रहरीको भनाइ छ । ब्युटिपार्लरको काम सिक्दै आएकी उनले पनि आफ्नो प्रेमीलाई तस्करीको सामान बेच्न सहयोग गर्ने गरेको प्रहरीको भनाइ छ ।दिनानाथ भने सन्तोषको चाँदीको सप्लाई गर्ने व्यक्ति हुन् । कालीगढको समेत काम गर्दै आएका उनी तस्करी भएर काठमाडौं आएको चाँदी सन्तोषले भनेको ठाउँमा पु¥याउने गरेको खुलेको छ ।