काठमाडौँ । नयाँसडक बुलेटिनमा यहाँहरूलाई स्वागत छ। आज चैत ११ सोमबार । यस्ता छन् दिनभरी घटेका मुख्यमुख्य आर्थिक समाचारहरू...

महाशक्ति सिमेन्टले  आइपीओ बिक्री गर्न , बोर्डसँग माग्यो अनुमति

काठमाडौं । महाशक्ति सिमेन्ट लिमिटेडले आइपीओ बिक्री गर्न नेपाल धितोपत्र बोर्डसँग अनुमति मागेको छ । कम्पनीले प्रतिकित्ता १०० रुपैयाँको दरले १ करोड ७८ लाख ५० हजार ८५७ कित्ता आइपीओ बिक्री गर्न अनुमति मागेको हो । अर्थात, कम्पनीले १ अर्ब ७८ करोड ५० लाख ८५ हजार ७०० रुपैयाँ बराबरको आइपीओ जारी गर्नेछ ।  यसमा लक्ष्मी सनराइज क्यापिटलले बिक्री प्रबन्धकको कार्य गर्नेछ ।

आज नेप्से परिसूचक ३०.५२ बिन्दु बढेर २६४५.२० बिन्दुमा , कारोबार करिब साढे चार अर्ब

काठमाडौँ । आज नेप्से परिसूचक ३०.५२ बिन्दु बढेर २६४५.२० बिन्दुमा पुगेको छ ।९७ लाख ३९ हजार ७सय ३८ कित्ता शेयरको खरिदबिक्रीबाट  ४ अर्ब ४८ करोड ३५ लाख ९९ हजार ४ रुपैया ४९ पैसार बराबर भएको हो ।
पछिल्लो समय २९०० बिन्दु माथि पुगेको नेप्से अहिले २६००मा झरेको छ ।

एप्पल सेक्युरिटिजलाई नेप्सेले गर्यो ३ दिनका लागि निलम्बन

काठमाडौं । नेपाल स्टक एकसचेन्ज (नेप्से) ले एप्पल सेक्युरिटिज प्रा।लिलाई ३ कार्यदिनका लागि निलम्बन गरेको छ । कम्पनीले तोकिएको समयावधि भित्र राफसाफ तथा फछ्यौट कार्य नगरेपछि सीडीएस एन्ड क्लियरिङ लिमिटेडको सिफारिसमा निलम्बन गरिएको नेप्सेले जनाएको छ ।

प्रि ओपन सेसन : नेप्से सूचक ४.२३ अंकले घट्यो

काठमाडौं । प्रि ओपन सेसनमा नेप्से सूचक ४.२३ विन्दुले घटेको छ । यससँगै सूचक २६१०.४५ अंकमा आएको छ । ६ लाख   रुपैयाँभन्दा बढीको सेयर कारोबार भएको छ । ३३ कम्पनीको ११ सय सय ६३ कित्ता सेयर कारोबार भएको छ ।

यो सेसनमा कुल ३९ वटा कारोबार भएको हो ।

अमेरिकासँग अप्रत्यक्ष आणविक वार्ता गर्न खुला : इरान

तेहरान । राष्ट्रपति डोनाल्ड ट्रम्पले नयाँ आणविक सम्झौताका लागि वार्ता गर्न माग गर्नुभएपछि इरानले सोमबार अमेरिकासँग अप्रत्यक्ष वार्ताका लागि खुला रहेको बताएको छ ।

“जबसम्म इरानप्रति अर्को पक्षको दृष्टिकोणमा परिवर्तन हुँदैन, अप्रत्यक्ष वार्ताका लागि बाटो खुला छ”, प्रत्यक्ष वार्ताको सम्भावनालाई अस्वीकार गर्दै विदेशमन्त्री अब्बास अराघचीले भन्नुभयो । 

उहाँका अनुसार तेहरानले धम्कीको अधीनमा र जबसम्म ट्रम्पले आफ्नो ‘अधिकतम दबाब’ नीति कायम राख्नुहुन्छ तबसम्म वासिङ्टनसँग प्रत्यक्ष वार्तामा संलग्न हुनेछैन ।

कांग्रेसको विज्ञान तथा सूचना प्रविधि विभागमा १० सदस्य थप

काठमाडौँ । नेपाली कांग्रेसको विज्ञान तथा सूचना प्रविधि विभागमा १० सदस्य मनोनयन गरिएका छन् ।

     सभापति शेरबहादुर देउवाले पार्टीको विधान, २०१७ (संशोधनसहित) को धारा २५ (९) बमोजिम पार्टी केन्द्रीय सदस्य सुशिला मिश्र भट्ट प्रमुख रहनुभएको उक्त सदस्यमा आज १० सदस्य मनोनयन गर्नुभएको हो ।

      मनोनित हुनेहरूमा इन्जिनीयर उज्ज्वल कोइराला (सङ्खुवासभा), इन्जिनीयर प्रेमचन्द्र राय (महोत्तरी), विजया श्रेष्ठ केसी (ललितपुर), प्रा मोहनजङ्ग शाह (बाँके), डा नीरञ्जन कोइराला (कास्की), कुमार लामिछाने (बर्दिया), रमा केसी (सुर्खेत), प्रेमलाल चौधरी (कैलाली), शेरबहादुर सार्की (बाजुरा) र दिलिप कार्की  (कञ्चनपुर) रहेका कांग्रेस केन्द्रीय कार्यालयका मुख्यसचिव कृष्णप्रसाद पौडेलले जानकारी दिनुभयो ।

राज्यले सही नीति लिन नसक्दा स्वास्थ्यकर्मी पलायन भइरहेका छन्ः स्वास्थ्यमन्त्री पौडेल

काठमाडौँ ।  स्वास्थ्य तथा जनसङ्ख्यामन्त्री प्रदीप पौडेलले राज्यले सही नीति लिन नसक्दा स्वास्थ्यकर्मी पलायन भइरहेका बताउनुभएको छ । चिकित्सा विज्ञान राष्ट्रिय प्रतिष्ठान (न्याम्स) वीर अस्पतालको पाँचौँ दीक्षान्त समारोहमा उहाँले नीतिसँगै राज्यको परिस्थिति पनि त्यसमा दोषी रहेको धारणा राख्नुभयो । 

मन्त्री पौडेलले नेपालमा चाहिने स्वास्थ्यतर्फका जनशक्ति उत्पादन भइरहेको पनि हरेक वर्ष एक हजार पाँच सयभन्दा बढी विदेशीने समस्या रहेको सुनाउनुभयो । उहाँले अब नीतिगत सुधारमार्फत समस्या समाधान गरिनुपर्ने र त्यसमा सबैको सहकार्य आवश्यक रहेको बताउनुभभो ।

संक्रमणकालीन न्याय प्रक्रिया अघि बढाउन फेरि सिफारिस समिति बनाउने तीन दलबीच  सहमति

काठमाडौँ ।  प्रमुख दलका तीन शीर्ष नेताहरूले संक्रमणकालीन न्यायको प्रक्रिया अघि बढाउन फेरि सिफारिस समिति गठन गर्न सहमति कायम गरेका छन् । सोमबार प्रधानमन्त्री तथा मन्त्रिपरिषद् कार्यालय, सिंहदरबारमा बसेको शीर्ष नेतृत्वको छलफलबाट यस्तो सहमति कायम भएको हो । आजको छलफलमा संक्रमणकालीन न्यायसम्बन्धी विवाद हेर्ने दुई आयोगमा पदाधिकारी सिफारिस गर्ने समिति गठनको प्रक्रिया अघि बढाउन सहमति भयो ।यसअघि पूर्वप्रधानन्यायाधीश ओमप्रकाश मिश्रको नेतृत्वमा गठित यस्तै समितिले कुनै पनि पदाधिकारीहरूको नाम सिफारिस गर्न सकेको थिएन ।

सूचना प्रविधि पूर्वाधार निर्माणमा केन्द्रीत बजेट बनाउन मन्त्री गुरुङको जोड

काठमाडौँ । सञ्चार तथा सूचना प्रविधिमन्त्री पृथ्वी सुब्बा गुरुङले बजेट बनाउदा सूचना प्रविधि(आइटी)पूर्वाधार निर्माणमा जोड दिनुपर्ने बताउनुभएको छ ।

त्रिवर्षीय (आव २०८२/८३–२०८४/०५)बजेट सीमा तथा स्रोतमाथि केन्द्रीत रही मन्त्रालयअन्र्तगतका विभाग र निकायसँग बजेट योजना छलफल कार्यक्रममा उहाँले बृहत्तर उद्देश्य बोकेका योजना ल्याउन विभागीय प्रमुखलाई ध्यानाकर्षण गराउनुभयो । 

सूचना प्रविधिको विकासले राजस्व वृद्धिमा निकै ठुलो टेवा पु¥याएको उल्लेख गर्दै नेपाल सरकारका प्रवक्तासमेत रहनुभएका मन्त्री गुरुङले आइटी क्षेत्रमा पूर्वाधार निर्माण नहुँदा यसबाट लाभ लिन नसकिने धारणा राख्नुभयो । “आइटी क्षेत्रमा पूर्वाधार नभई सोचे जस्तो लाभ लिन र उत्पादन गर्न कठिन छ ।

विश्व बैङ्कले देखेको नेपालको अर्थतन्त्रको परिदृश्यः विप्रेषणले गरिबी घटायो, आन्तरिक अवसरबाट न्यून लाभ

काठमाडौँ ।विप्रेषण र आप्रवासनका कारण पछिल्लो तीन दशकमा नेपालको गरिबी उल्लेख्य रूपमा घटे पनि आन्तरिक अर्थतन्त्र विस्तार भने निकै कमजोर देखिएको विश्व बैङ्कले जनाएको छ ।

‘नेपाल कन्ट्री इकोनोमिक मेमोरान्डम, २०२५’ प्रतिवेदन सार्वजनिक गर्दै विश्व बैङ्कले सुदृढ आर्थिक वृद्धि हासिल गर्न आन्तरिक अवसरको खोजी गरी लाभ लिन सक्नुपर्ने सुझाव दिएको छ । निर्यात, जलविद्युत् उत्पादन, पर्यटन, सूचना प्रविधिलगायत क्षेत्रबाट लाभ लिनसक्ने प्रचुर सम्भावना भए पनि नेपालले ती अवसर गुमाइरहेको प्रतिवेदनको निश्कर्ष छ । विप्रेषण तथा आप्रवासनले गरिबी निवारणमा उल्लेख्य भूमिका खेले पनि नेपालले यस क्षेत्रबाट उत्पादनशील क्षेत्रमा लगानी र आन्तरिक रोजगारी सिर्जनामा थप लाभ लिन नसकेको पनि विश्व बैङ्कले जनाएको छ ।

जेडटिइको नेपाली बजारमा पुनरागमन, ब्लेड ए र नुबिया सिरिजका ५ वटा मोडल सार्वजनिक

काठमाडौँ  ।एकीकृत सूचना तथा सञ्चार प्रविधि समाधानको ग्लोबल लिडर जेडटिई कर्पोरेशनले आफ्नो ब्लेड ए र नुबिया सिरिजका ५ फिचर–प्याक्ड स्मार्टफोन मोडलहरू सार्वजनिक गर्दै नेपालमा पुनः प्रवेश गरेको छ । आकर्षक डिजाइनमा उपलब्ध यी मोडलहरुको पर्फर्मेन्स पनि उत्कृष्ट हुनुको साथै नवीन प्रविधियुक्त पनि छन् । जेडटिईको नेपालको लागि आधिकारीक वितरकको रुपमा शंकर ग्रुप रहेको छ । शंकर ग्रुपसँगको सहकार्यमा जेडटीईले ब्लेड ए र नुबिया सिरिज मार्फत नेपाली ग्राहकहरूको आवश्यकताहरू पूरा गर्ने लक्ष्य राखेको छ ।

संस्कार ट्रेडर्सका सञ्चालक होमप्रसाद चालिसे विरुद्ध साढे ५ करोडको बिगो दाबीसहित राजस्व चुहावट मुद्दा दायर

काठमाडौँ । राजस्व अनुसन्धान विभागले मदिरा आपूर्ति गर्ने एक कम्पनीलाई  राजस्व चुहावट कसुरमा साढे पाँच करोड बढीको मागदाबी गरी मुद्दा दायर गरेको छ ।राजस्व अनुसन्धान विभागले मदिरा सप्लाई गर्दै आएको संस्कार ट्रेडर्सका संचालक होमप्रसाद चालिसे विरुद्ध मुद्दा१० गते चैतमा  दायर भएको  जनाएको हो ।

मदिराको बिक्री वितरणमा राजस्व चुहावट गरेको भन्दै राजस्व अनुसन्धान विभागले उच्च अदालत पाटनमा ५ करोड ५१ लाख १८ हजार ४५२ रुपैयाँ बिगो माग दाबी गर्दै अभियोगपत्र दायर गरेको विभागले जारी गरेको विज्ञप्तिमा जनाइएको छ ।  चालिसेमाथि संस्कार ट्रेडर्स नामको फर्म मार्फत् बिल बीजक जारी नगरी मदिराजन्य पदार्थहरु बिक्री गरि मूल्य अभिवृद्धि कर राजस्व छली गरेको आरोप छ।

किन नियन्त्रणमा आउन सकेन अझै दाङको प्लाई उद्योगको आगलागी ?

दाङ।  गएराति २ बजेदेखि साङ्ग्रिला प्लाई उद्योगमा सुरू भएको आगलागी अझै नियन्त्रणमा आउन सकेको छैन । दाङको घोराही उपमहानगरपालिका–९ खैरामा रहेको सो उद्योगमा लागेको आगो हालसम्म पनि नियन्त्रणमा आउन नसकेको हो । अझैसम्म पनि उद्योगमा लागेको आगलागी पूर्ण नियन्त्रणमा आउन नसकेको दाङका प्रमुख जिल्ला अधिकारी कृष्णप्रसाद लम्सालले बताउनुभयो । उहाँका अनुसार हाल सात वटा दमकलले आगो निभाइरहेका छन् । दाङको घोराही, तुलसीपुर उपमहानगरपालिका र लमही नगरपालिका तथा बर्दियाको बाँसगढी नगरपालिका, बाँकेको कोहलपुर नगरपालिका, कपिलवस्तुको शिवराज नगरपालिका र रुपन्देहीबाट एउटा दमकल ल्याएर आगो निभाउने क्रम जारी छ ।

सल्यानमा जीप दुर्घटना, १७ जना घाइते

सल्यान । सल्यानमा जीप दुर्घटना हुँदा १७ जना घाइते भएका छन् । कुमाख गाउँपालिकाको तिमिलेबाट श्रीनगर आउँदै गरेको भे १ ज १२१४ नम्बरको जीप सिद्धकुमाख गाउँपालिका–३ फलाटे नजिकै गतियानामा सोमबार बिहान करिब १० बजेतिर दुर्घटना भएको हो ।

जिलला प्रहरी कार्यालय सल्यानका प्रहरी निरीक्षक रेशमबहादुर खत्रीका अनुसार दुर्घटनामा घाइते भएका सबैलाई तत्काल उद्धार गरिएको र सबैको शारदा नगरपालिका–१ श्रीनगर स्थित शारदा पोलिक्लिनिकमा उपचार भइरहेको छ । उनका अनुसार ब्रेक फेल भएर भित्तामा ठोक्किँदा यात्रुबाहक जीप सडकमै पल्टिएको थियो ।

अमेरिकाबाट निष्कासनपछि १९९ आप्रवासी भेनेजुएलामा अवतरण

मैक्वेटिया । संयुक्त राज्य अमेरिकाबाट निष्काशित १९९ आप्रवासी बोकेको विमान सोमबार बिहान भेनेजुएला आइपुगेको गृहमन्त्री डिओसडाडो काबेलोले बताउनुभएको छ ।

“आज, हामी १९९ जना स्वदेशीहरूलाई स्वागत गर्दैछौं,” उहाँले विमानस्थलमा बताउनुभयो ।“हामी भेनेजुएलाका मानिसहरू जहाँ भए पनि स्वागत गर्न तयार छौं ।”

प्रत्यक्ष फुटेजमा स्वेटसूट लगाएका युवाहरू राजधानी काराकास बाहिर अवतरण गरेको विमानबाट ओर्लिरहेको देखाइएको छ । तिनीहरूमध्ये केही मुस्कुराइरहेका र ताली बजाइरहेका थिए ।

किन दिइयो विदेशी पुनर्बीमा ब्रोकरहरूलाई नेपालमा कार्यालय राख्न आदेश ?

काठमाडौँ ।  नेपाल बीमा प्राधिकरणले विदेशी पुनर्बीमा ब्रोकरहरूलाई कार्यालय स्थापना गर्न निर्देशन दिएको छ।इजाजत पत्र  प्राप्त विदेशी पुनर्बीमा ब्रोकरहरूले  प्राधिकरणको निर्देशनलाई अटेर गरेको देखिएपछि नेपालमा कार्यालय खोल्न आदेश दिइएको हो ।

प्राधिकरणले बीमकको पुनर्बीमा निर्देशिका २०८० बमोजिम हालसम्म कार्यालय स्थापना नगरेका विदेशी पुनर्बीमा ब्रोकरहरूलाई ३ महिनाभित्र कार्यालय स्थापना गर्न निर्देशन दिएको हो।

निर्देशिकामा व्यवस्था गरिए अनुसार प्राधिकरणमा सूचीकरण भएका र सूचीकरण नम्बर प्राप्त गरेका पुनर्बीमा ब्रोकरले ६ महिनाभित्र नेपालमा संयुक्त लगानीमा कम्पनी, शाखा वा सम्पर्क कार्यालय स्थापना गर्नुपर्ने व्यवस्था  छ ।

गुणस्तरीय र अत्याधुनिक टायल्स "सिम्पोलो"ले नेपालमा आक्रामक बजार विस्तार गर्दै,पेप्सीकोला रोडमा खुल्यो सिम्पोलोको अर्को शोरुम, यस्तो छ सिम्पोलोको इतिहास

काठमाडौँ । विश्वका ४५ पैँतालीस भन्दा बढी देशहरूमा  प्रख्यात भारतीय टायल्स कम्पनी सिम्पोलोले नेपालमा पनि  आक्रामक  बजार विस्तार गर्दै छ ।  आक्रामक बजार विस्तारको योजनासहित सिम्पोलोले काठमाडौँमा  मार्बलहरूको हब भनेर चिनिने पेप्सीकोला रोडमा  सिम्पोलोको अत्याधुनिक शोरुम संचालन गरिएको छ ।
 काठमाडौँको पेप्सीकोला रोडमा स्क्वायर फिट स्टोर प्रालि मार्फत् अब काठमाडौँ भरि सिम्पोलो ब्रान्डका अत्याधुनिक टायल्स र बाथवेयर बिक्री वितरण हुने सिम्पोलोका  जनरल म्यानेजर रणजीत सिन्हाले नयाँ सडकलाई बताए । विगतमा जेजे मार्बल हाउस मार्फत् सिम्पोलो ब्रान्डका उत्पादनहरू बिक्री वितरण हुँदै आएकोमा अब स्क्वायर फिट स्टोर प्रालि मार्फत् पनि सिम्पोलो ब्रान्डका अत्याधुनिक  टायल्स तथा बाथवेयरहरू  थोक र खुद्रा मूल्यमा बिक्री वितरण गरिने  जनरल म्यानेजर सिन्हाले बताए ।

राष्ट्रिय जीवन बिमा कम्पनीको वार्षिक साधारण सभा वैशाख ३ गते, लाभांश वितरण नगर्ने निर्णय

काठमाडौं । राष्ट्रिय जीवन बिमा कम्पनी ९पूर्व राष्ट्रिय बिमा संस्थान० ले आगामी वैशाख ३ गते वार्षिक साधारण सभा बोलाएको छ। सभा कम्पनीको प्रधान कार्यालय, रामशाह पथ काठमाडौंमा अपरान्ह ४ बजे सुरु हुनेछ। यस पटक कम्पनीले लाभांश वितरण नगर्ने निर्णय गरेको छ, जसले लगानीकर्तालाई निराश पार्ने संभावना छ।

सभामा कम्पनीले पुँजी वृद्धिको योजनालाई अनुमोदन गर्ने प्रस्ताव राख्नेछ। साथै, कम्पनीको प्रबन्धपत्र र नियमावलीमा समयानुकूल संशोधन गर्न र गर्न प्रस्तावका लागि सञ्चालक समितिलाई अख्तियारी प्रदान गर्ने विशेष प्रस्ताव पनि पेश हुनेछ।

सिटिजन लाइफ इन्सुरेन्सको वार्षिक साधारण सभा चैत १५ गते, २६.९८% बोनस सेयर र १.४२% नगद लाभांश प्रस्ताव

काठमाडौं ।  सिटिजन लाइफ इन्सुरेन्सको वार्षिक साधारण सभा आगामी चैत १५ गते बिहान ११ बजे काठमाडौंको आम्रपाली ब्यांकेट, भाटभटेनी, नक्सालमा आयोजित हुने भएको छ । सभा अवधिमा कम्पनीले २६.९८ प्रतिशत बोनस सेयर र १।४२ प्रतिशत नगद लाभांश ९कर तिर्न० वितरण गर्ने प्रस्ताव पेश गर्नेछ ।

सभामा कम्पनीको वार्षिक प्रतिवेदन, नाफा नोक्सान हिसाब र नगद प्रवाह विवरणमा छलफल गरेर पारित गर्ने एजेन्डा पनि तय भएको छ । साथै, फागुन २८ गते बुक क्लोज गरिसकेको छ । फागुन २७ गतेसम्म कायम सेयरधनीहरूले मात्र प्रस्तावित लाभांश प्राप्त गर्नेछन् ।

सुनको भाउ ६०० रुपैयाँले घट्यो, चाँदीको भाउ स्थिर

काठमाडौं । नेपाल सुनचाँदी व्यवसायी महासंघका अनुसार सोमबार छापावाल सुन प्रतितोला ६०० रुपैयाँले घटेर १ लाख ७३ हजार ५०० रुपैयाँ कायम भएको छ । 

सोमबार चाँदीको भाउ भने स्थिर रहेको छ । सोमबार चाँदीको भाउ तोलामा १९ सय ८० रुपैयाँ कायम रहेको छ ।

वीरगञ्ज नाकाबाट एक खर्ब २२ अर्बको पेट्रोलियम पदार्थको आयात

वीरगञ्ज ।चालु आर्थिक वर्षको आठ महिनामा वीरगञ्ज नाका भएर रु एक खर्ब २२ अर्ब २० करोड बराबरको पेट्रोलियम पदार्थ आयात भएको छ । डिजेल, पेट्रोल, लिक्विफाइड पेट्रोलियम ग्यास (एलपिजी), एभिएसन टर्बाइन फ्युल (एटिएफ) र मट्टितेल आयात भएको हो ।

गत आवको  आठ महिनाका तुलनामा चालु आवको सोही अवधिमा रु एक अर्ब ६७ करोड बढीको पेट्रोलियम पदार्थ आयात भएको हो । गत आवको आठ महिनामा रु एक खर्ब  २० अर्ब ५३ करोडको पेट्रोलियम पदार्थ आयात भएको थियो । वीरगञ्ज भन्सार कार्यालयका प्रमुख भन्सार प्रशासक दीपक लामिछानेले चालु आवमा पेट्रोलियम पदार्थको आयात र राजस्व बढेको बताउनुभयो । 

“अहिले पूर्वाधार निर्माणको समय भएकाले पनि पेट्रोलियम पदार्थको आयात बढेको देखिन्छ”, उहाँले भन्नुभयो । कार्यालयका अनुसार, चालु आवको आठ महिनामा सबै खालका पेट्रोलियम पदार्थको आयातबाट रु ५० अर्ब १३ करोड राजस्व सङ्कलन भएको छ । गत आवको सोही अवधिमा रु ४४ अर्ब ८० करोड राजस्व सङ्कलन भएको थियो ।

आजका लागि यस्तो छ विदेशी मुद्राको विनिमयदर

काठमाडौँ ।नेपाल राष्ट्र बैङ्कले आजका लागि विदेशी मुद्राको विनिमयदर निर्धारण गरेको छ । अमेरिकी डलरको भाउ स्थिर रहेको छ । केन्द्रीय बैंकका अनुसार अमेरिकी डलर एकको खरिददर १३७ रूपैयाँ २६ पैसा र बिक्रीदर १३७ रूपैयाँ ८६ पैसा कायम भएको छ ।

त्यसैगरी युरोपियन युरो एकको खरिददर १४८ रूपैयाँ ४५ पैसा र बिक्रीदर १४९ रूपैयाँ १० पैसा, युके पाउन्ड स्टर्लिङ एकको खरिददर १७७ रूपैयाँ ३३ पैसा र बिक्रीदर १७८ रूपैयाँ ११ पैसा, स्वीस फ्र्याङ्क एकको खरिददर १५५ रूपैयाँ ३९ पैसा र बिक्रीदर १५६ रूपैयाँ ०७ पैसा कायम गरिएको छ ।

अष्ट्रेलियन डलर एकको खरिददर ८६ रूपैयाँ ०८ पैसा र बिक्रीदर ८६ रूपैयाँ ४५ , क्यानेडियन डलर एकको खरिददर ९५ रूपैयाँ ६५ पैसा र बिक्रीदर ९६ रूपैयाँ ०७ पैसा, सिङ्गापुर डलर एकको खरिददर १०२ रूपैयाँ ७३ पैसा र बिक्रीदर १०३ रूपैयाँ १८ पैसा निर्धारण गरिएको छ ।

वीरगञ्ज उद्योग वाणिज्य सङ्घको नयाँ अध्यक्षमा हरि गौतम निर्विरोध निर्वाचित

वीरगञ्ज। वीरगञ्ज उद्योग वाणिज्य सङ्घको अध्यक्षमा हरि गौतम निर्विरोध निर्वाचित हुनुभएको छ । 
सङ्घको ४९औँ वार्षिक साधारणसभा तथा अधिवेशनबाट वरिष्ठ उपाध्यक्षमा माधव राजपाल, द्वितीय उपाध्यक्षमा मनोज दास, महासचिवमा शिवजीप्रसाद कलवार, कोषाध्यक्षमा अनोज रुङ्गटा, सचिवमा प्रेमचन्द्र गोयल, सुशान्त चाचान, सहकोषाध्यक्षमा निरज अग्रवाल र सहसचिवमा नरेश टिवडेवाल निर्विरोध निर्वाचित भएका छन् । यस्तै सहसचिवमा अनुप अग्रवाल निर्वाचनबाट निर्वाचित भएको प्रमुख निर्वाचन अधिकृत बालमुकुन्द खरेलले जानकारी दिनुभयो । पदाधिकारीमध्ये सहसचिव पदका लागि मात्र मतदान भएको थियो । सङ्घको विधानअनुसार १२ जना पदाधिकारी रहने व्यवस्था छ ।